Fətizadə: riskin mövcudluğu maliyyə xidmətindən imtina üçün əsas deyil

Çirkli pulların yuyulmasına və terrorçuluğun maliyyələşdirilməsinə qarşı mübarizə maliyyə inklüzivliyini məhdudlaşdırmamalıdır. Bunu Maliyyə Monitorinqi Xidmətinin İdarə Heyətinin sədri Zaur Fətizadə bildirib.

Onun sözlərinə görə, riskin mövcudluğu müştəriyə maliyyə xidmətinin göstərilməsindən imtina üçün əsas sayılmamalı, risklərə uyğun nəzarət mexanizmləri qurulmalıdır.

“Qanuni iqtisadi fəaliyyətə imkan qorunmaqla maliyyə sistemindən sui-istifadə hallarının qarşısı alınmalıdır”, - Fətizadə deyib.

O bildirib ki, bunun üçün risk əsaslı yanaşma, effektiv daxili nəzarət və şübhəli əməliyyatların vaxtında müəyyən edilməsi vacibdir.

Fətizadənin sözlərinə görə, aşağı riskli hallarda sadələşdirilmiş tədbirlər, yüksək riskli hallarda isə gücləndirilmiş nəzarət tətbiq olunmalıdır. Bu, resursların yüksək risk daşıyan əməliyyatlara yönəldilməsinə imkan verər.

“Riskin mövcudluğu heç bir halda maliyyə xidmətlərinin göstərilməsindən imtina edilməsini tələb etmir”, - o bildirib.

Xidmət rəhbəri mikromaliyyə sektorunun maliyyə xidmətlərindən kifayət qədər istifadə etməyən şəxsləri, özünüməşğul əhalini və kiçik sahibkarları formal maliyyə sisteminə cəlb etməkdə rol oynadığını deyib.

O vurğulayıb ki, sektor xidmətlərin əlçatanlığı ilə yanaşı, onların təhlükəsizliyini və etibarlılığını da təmin etməlidir.

Fətizadə maliyyə inklüzivliyinin genişləndirilməsinə dair 2027–2030-cu illər Dövlət Proqramının və mikromaliyyə modeli üzrə strateji çərçivənin sektor üçün yeni imkanlar yaratdığını bildirib.

O, inklüzivlik və maliyyə təhlükəsizliyi tədbirlərinin təsirinin ölçülməsini, sektor üzrə spesifik risklərin müəyyənləşdirilməsini və qurumlararası əməkdaşlığın gücləndirilməsini vacib sayıb. Dövlət proqramı 2026-cı il mayın 26-da prezident sərəncamı ilə təsdiqlənib.

Rəqəmsal alətlərin riskləri daha sürətli aşkar etməyə kömək edə biləcəyini deyən Fətizadə kibertəhlükəsizlik və texnoloji dayanıqlılığın da diqqətdə saxlanılmasını vurğulayıb.

Onun sözlərinə görə, innovasiyalar adekvat nəzarət və təhlükəsizlik mexanizmləri ilə müşayiət olunmalıdır.


Gülnar Nazimqızı