Əli Əsədov: Azərbaycan-Gürcüstan ticarət dövriyyəsi 9 ayda 42% artıb

Azərbaycan və Gürcüstan arasında ticarət dövriyyəsi 2026-cı ilin ilk 9 ayında 42% artaraq Azərbaycan statistikasına görə 888 milyon dollara, Gürcüstan statistikasına görə isə 1,1 milyard dollara yaxınlaşıb. Bunu Azərbaycanın Baş naziri Əli Əsədov bildirib.

Onun sözlərinə görə, Gürcüstan Azərbaycanın əsas ticarət tərəfdaşlarından biridir və iki ölkə arasında ticarət-iqtisadi əməkdaşlıq müsbət dinamika ilə genişlənir.

Baş nazir qeyd edib ki, investisiya sahəsində də əməkdaşlıq inkişaf edir. Azərbaycanın Gürcüstan iqtisadiyyatına yatırdığı investisiyaların həcmi 4 milyard dollara yaxındır. Əli Əsədovun sözlərinə görə, Azərbaycan Gürcüstana ən çox sərmayə yatıran ölkədir.

O, enerji sahəsində birgə layihələrin əhəmiyyətinə də toxunub. Bildirib ki, Bakı-Tbilisi-Ceyhan (BTC) neft kəməri və Cənub Qaz Dəhlizi regionun və Avropanın enerji təhlükəsizliyinin təmin olunmasında, enerji təchizatı marşrutlarının şaxələndirilməsində mühüm rol oynayır.

Baş nazirin sözlərinə görə, hazırda Azərbaycan qazı 16 ölkəyə ixrac olunur.

Gülnar Nazimqızı