Onun sözlərinə görə, valideynlərin dövlət başçısına müraciət etməsinin səbəbi istintaqın gedişatından razı qalmamalarıdır. "İstintaqın 2 ay yarımdan çox müddətə davam etməsinə baxmayaraq, ortada heç bir nəticənin olması valideynləri narahat edir və onlar bundan narazıdılar. Valideynləri dəfələrlə istintaq qrupunun rəhbərinə, üzvlərinə müraciət edir, hər hansı məlumatın olub-olmaması ilə maraqlanırlar. Valideynlər yeganə oğul övladlarının vəfatının səbəblərini araşdırmaq üçün  təyin olunmuş məhkəmə-tibb ekspertizasının, Rasimin ölmündə həkim səhlənkarlığının olub-olmaması barədə mütəxəssis rəyi verməli olan Səhiyyə Nazirliyinin nəzdindəki xüsusi komissiyasının rəyləri nə istintaqa, nə də ailəyə təqdim verilmədiyini deyiblər. Onların fikrincə,  rəylərin bu günə qədər hazır olmaması istintaqın gedişinə ciddi maneələr törədir. Valideynlər hesab edir ki, Rasim Əliyevin ölümündə həkimlərin səhlənkarlığı  da ciddi rol oynayıb və komissiyanın rəyinin istintaqa təqdim edilməməsi şübhələrinizi daha da artırır. Qanuna uyğun olaraq, tibbi ekspertizanın rəyi bir ay ərzində istintaqa təqdim edilməli idi. Onların prezidentə yazdığı müraciətdə deyilir ki, naməlum səbəbdən həm məhkəmə-tibb ekspertiza idarəsi, həm də Səhiyyə Nazirliyi bu rəyin verilməsini süni şəkildə yubadır”. 

Vəkil xatırladıb ki, faciə baş verən gündən dövlət başçısı bu hadisəni nəzarətinə götürdüyünü bildirib və hazırda valideynlər də bu səbəbdən ölkə rəhbərliyinə  müraciət edərək şikayətlərini onun diqqətinə çatdırmaqdır: "Valideynləri narahat edən digər məqam isə Rasim Əliyevi ilk müayinə edən həkimlərin tam ətraflı yoxlanılmamasıdır. Həkim səhlənkarlığı, həkim rəyləri, ilkin yoxlanışların tam araşdırılıb onlara məlumat verilməməsi ailəni daha çox narahat edir”. 

Əsabəli Mustafayev onu da qeyd edib ki, Bakı Şəhər Prokurorluğunda yaradılan istintaq qrupunun rəhbəri  müstəntiq Kamran Məmmədov iki həftəlik bülletenə çıxıb: "Valideynlər prezidentə müraciətdə bildiriblər ki,  bu səbəbdən də Rasim Əliyevin ölümü ilə bağlı istintaq tədbirləri tamamilə dayandırılıb. Onlar ehtimal edirlər ki, bəzi şəxslər istintaqın uzadılmasından sui-istifadə edərək oğullarının ölmündə təqsiri olanları məsuliyyətdən yayındırmaq niyyəti  güdürlər”.

 

 

Mərhum jurnalist Rasim Əliyevin anası Teyfurə Əliyeva ANN.Az-a açıqlamasında prezident İlham Əliyevə müraciət etdiklərini deyib. O, bütün faktların ortada olduğu, günahkarın bəlli olduğu bir şəraitdə istintaqın bilərəkdən uzadıldığından şikayətçi olub: "Həkimlərlə bağlı tam araşdırma aparılmır. Niyə onlar məhsuliyyətə cəlb olunumurlar? İstintaqda kamera görüntülərinə hələ də baxa bilməmişik. Amma qarşı tərəfinin vəkilinə həmin görüntüləri göstəriblər. Bizə göstərilməməsinin əsas səbəbi nədir? Niyə bizdən gizli saxlanılır fotolar, görüntülər? Bax bütün bunlar artıq 3 aya yaxın müddətdir ki, bizi çox narahat edir”. 

T.Əliyevə prezidentə müraciətdə oğlu Rasim Əliyevin ölümü ilə bağlı cinayət işini şəxsi nəzarətə götürülməsini nəzərə alaraq ekspertiza idarəsinə və Səhiyyə Nazirliyinə qısa zamanda rəy vermə tapşırığı verməsini xahiş ediblər: "Cənab prezidentdən həmçinin xahiş edirik ki, Bakı Şəhər Prokurorluğu tərəfindən  istintaqın gedişinin sürətləndirilməsi ilə də bağlı tapşırıq versin”.