Emin Kürdov Çimərlik futbolu üzrə yarışlarda ilk rəqibimizin Ukrayna komandası olduğunu deyib: "Biz bu komanda ilə 2012-ci ildə qarşılaşmışdıq və həmin oyunda 6-2 hesabı ilə qalib gəlmişdik. Amma həmin il onlar Avropa çempionu olmuşdular. Yəni onu bildirmək istəyirəm ki, onlarla oyunlarımızın əksəriyyəti bərabər səviyyədə keçib. Ukraynadan sonra İsveç yığması ilə qarşılaşacayıq. Bu komanda ilə də əvvəllər oynamışıq və Bakıdakı həmin oyunda 1-0 hesabı ilə məğlub olmuşduq. Buna baxmayaraq, biz hər zaman mübarizəyə hazırıq". 

Çimərlik futbolunun nümayəndəsi qalibiyyətin tamaşaçı dəstəyindən asılı olduğunu vurğulayıb:"Onlar nə qədər çox bizi ruhlandırsalar, bizə dəstək olduqlarını göstərsələr, qələbə şansımız da bir o qədər çox olacaq. Komandamız oyunlara tam hazır vəziyyətdədir, əhval-ruhiyyə çox yüksək səviyyədədir. Axıra qədər də belə olması üçün mübarizə aparacayıq".

Emin Kürdov daha sonra bildirib ki, Federasiya tərəfindən qarşılarına belə məqsəd qoyulub: "Yarışlarda ilk üç yerdən birini tutmalıyıq. Həqiqətən də bu yerlərdən birinə sahib olmaq bizim üçün böyük uğur olacaq. Düşünürəm ki, qalib gəlsək, Azərbaycan tarixinə düşəcəyik".

Çimərlik futbolunun ölkəmizdə yaranan ən gənc idman növlərindən biri olduğunu söyləyən E.Kürdov bu idman üzrə yarışların 2008-ci ildən keçirildiyini qeyd edib: "Yeni yaranmasına baxmayaraq, bu sahədə artıq uğurlarımızda çoxdur. Avropa reytiqində çimərlik futbolu üzrə 12-ci yerdəyik. Bu da onu göstərir ki, Azərbaycanda çimərlik futbolu yaxşı səviyyədədir. Bu idman yarışının Avropa Oyunlarına salınması da çimərlik futbolunun inkişafının bariz nümunəsidir".