Dağlıq Qarabağ münaqişəsi Avropa mediasının gündəmində

Trend-in məlumatına görə, Euractiv.com saytında Belçikada yerləşən "Avropa Naminə Dialoq” təşkilatının təsisçisi və direktoru xanım Eli Hadjiyevanın "Terrorçular üçün asan hədəf: Ermənistandakı Metsamor AES” adlı məqalə işıq üzü görüb (http://www.euractiv.com/section/europe-s-east/opinion/easy-target-for-terrorists-armenias-metsamor-nuclear-plant/).

Məqalədə qeyd olunur ki, müasir zamanda dünyanın istənilən ərazisində yerləşən xüsusi strateji əhəmiyyət daşıyan obyektlər terrorçuların hədəfinə çevrilib. Potensial hədəflərdən biri də Avropa İttifaqının sərhədlərində, Ermənistanda yerləşən Metsamor AES-dir. Məqalə müəllifi hesab edir ki, 1976-cı ildə köhnəlmiş Sovet texnologiyası əsasında tikilən, soyutma sisteminə malik olmayan, habelə aktiv seysmik zonada yerləşən bu stansiyanın istismarı dayandırılmalıdır.

"Deutsche Welle” teleradio şirkətinin internet səhifəsində isə xanım Seda Sərdarın "Dağlıq Qarabağdan olan məcburi köçkünlər üçün "Vətən kimi əziz yer yoxdur” məqaləsi yayımlanıb.

(http://www.dw.com/en/no-place-like-home-for-nagorno-karabakhs-displaced/a-19382617). Ermənistan-Azərbaycan, Dağlıq Qarabağ münaqişəsindən bəhs olunan məqalədə məcburi köçkünlərin və qoşunların təmas xəttinə yaxın ərazilərdə yaşayan şəxslərin yaşayış durumu haqqında məlumat verilib, həmçinin onların münaqişənin həlli ilə bağlı fikirlərinə də yer ayrılıb.

Huffington Post informasiya portalının fransızdilli versiyasında isə "Əfqanıstanda Seçilmiş Qadınların Səfərbər Olunması” təşkilatının sədri xanım Patrisiya Lalondun Dağlıq Qarabağda nüvə problemi” sərlövhəli məqaləsi dərc olunub (http://www.huffingtonpost.fr/patricia-lalonde/lenjeu-nucleaire-dans-le-haut-karabagh_b_10812908.html?utm_hp_ref=france). Patrisiya Lalond məqalədə cari ilin aprel ayında Ermənistan-Azərbaycan qoşunlarının təmas xəttinin yaxınlığında yerləşən bir çox kəndlərin əhalisinin işğal olunmuş ərazilərdən açılan atəşə məruz qaldığı qeyd edir.

Yazıda təmas xəttində yaxın ərazilərə fosfor bombasının atılmasının yerli sakinlərin həyatı üçün doğurduğu təhlükə və narahatlıq da əksini tapıb.

Müəllifin fikrincə, qoşunların təmas xəttində silahlı toqquşmalar bərpa olunduqca, regionda terror təhlükəsinin riski də artır. Müəllif qeyd edir ki, terrorçuların hədəflərindən biri də Ermənistanda yerləşən köhnəlmiş Metsamor AES-i ola bilər.