Əli Həsənov: "Azərbaycan Donald Trampla əməkdaşlığa ümid edir"

ANN.Az Trend-ə istinadən bildirir ki, bunu jurnalistlərə Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov ABŞ-da keçirilən prezident seçkilərinin nəticəsinə münasibət bildirərkən deyib.

Ə.Həsənov qeyd edib: "Dünən Amerika xalqı öz seçimini etdi. Donald Trampi özlərinə növbəti - 45-ci prezident seçdilər. Bununla bağlı Azərbaycan Prezidenti İlham Əliyev də təbrik məktubu ünvanladı. Düşünürük ki, bu, Amerika xalqının seçimidir və Azərbaycan da buna hörmətlə yanaşır və Trampla əməkdaşlığa ümid edir".

Prezidentin köməkçisi bildirib ki, ABŞ ilə Azərbaycan arasında çox səmərəli əməkdaşlıq əlaqələri var: "Bunların sırasında enerji sahəsində beynəlxalq əməkdaşlığı qeyd etmək olar. Regional və beynəlxalq nəqliyyat-kommunikasiya sahəsində əməkdaşlığı da buraya aid etmək olar. Uğurlu əməkdaşlıq sahələrindən biri də təhlükəsizlikdir. ABŞ ilə birgə neçə ildir ki, dünyada sülhyaratma proseslərində iştirak edirik. Azərbaycan hərbçiləri ABŞ hərbçiləri ilə çiyin-çiyinə Avropada və dünyanın digər qaynar nöqtələrində sülhyaratma prosesinə qatılıblar. Düşünürük ki, bu sahələrdə əməkdaşlıq davam etdriləcək".

Ə.Həsənov əlavə edib: "Lakin ən böyük gözləntimiz - cənab Prezident İlham Əliyevin də təbrik məktubunda qeyd etdiyi kimi, ABŞ-ın Minsk qrupunda daha aktiv və dinamik fəaliyyət göstərəcəyinə olan ümidimizdir. Düşünürük ki, nəhayət, cənab Trampın rəhbərliyi altında ABŞ Minsk qrupunda bir qədər də aktiv fəaliyyət göstərəcək, neçə illərdir, həllini gözləyən Ermənistan-Azərbaycan, Dağlıq Qarabağ münasişəsi öz həllini tapacaq, bu prosesdə status-kvo aradan qalxacaq və bu prosesə bir dinamizm gələcək. Biz bunu gözləyirik və ümid edirik ki, bu, belə də olacaq".

Prezidentin köməkçisi vurğulayıb ki, digər sahələr üzrə ABŞ-Azərbaycan münasibətləri davam edəcək və inkişaf edəcək.