Sarkisyan: “Azərbaycan dilində danışa bilirəm”

 

Modern.az saytı xəbər verir ki, müsahibə zamanı Bakı ilə Yerevan arasında "qaynar xətt”in yaradılmasından danışan Serj Sarkisyan Azərbaycan dilini bildiyini də xatırlayıb.

"Bəli, mən Azərbaycan dilində danışıram. Amma bu dildə danışanları anlamağım danışmağımdan daha yaxşıdır”-deyə o deyib.

 

Xatırladaq ki, Serj Sarkisyan 1954-cü il iyunun 30-da Azərbaycanın Xankəndi şəhərində anadan olub.

1989-cu ildən 1993-cü ilə kimi Dağlıq Qarabağdakı separatçı rejimin özünümüdafiə qüvvələri komitəsinə rəhbərlik edib. 1993-1995-ci illərdə Ermənistanın müdafiə naziri olub. 1995-1996-cı illərdə əvvəlcə dövlət təhlükəsizliyi departamentinin başçısı, daha sonra milli təhlükəsizlik naziri vəzifəsində çalışıb. 

Növbəti 3 ildə isə Ermənistanın daxili işlər və milli təhlükəsizlik naziri olub. 

2000-2007-ci illər arasında yenidən müdafiə naziri işləyib. 4 aprel 2007-ci ildən 19 fevral 2008-ci ilə qədər baş nazir, 19 fevral 2008-ci ildən isə Ermənistan Respublikasının prezidentidir.

Sarkisyanın arvadı Rita Sarkisyan da qarabağlıdır. Erməni prezidentin Anuş və Satenik adlı iki qızı var. Böyük qızı Anuş Sarkisyan ixtisasca hüquqşünasdır və Ermənistanın Vatikandakı səfiri Mikayıl Minansyanla evlidir. Ermənistan prezidentinin kiçik qızı Satenik Sarkisyan isə ixtisasça iqtisadçıdır. O, anası Rita Sarkisyanın qohumu və Ermənistanın Konstitusiya məhkəməsinin sədri Qalik Arutunyanla evlidir.