Azərbaycandakı Rus icmasının bəyanatı: “Rusiyanı başa düşməyi xahiş edirik”

27.03.2022 18:46

Azərbaycanın Rus İcması Respublika Şurası Ukraynada hərbi əməliyyatlar nəticəsində dinc əhalinin həlak olması ilə əlaqədar rus və ukrayna xalqlarına dərin hüznlə başsağlığı verir.

Bu barədə Rus İcmasının yaydığı bəyanatda deyilir.

"Azərbaycanda yaşayan rus icmasının Respublika Şurası Ukraynada aparılan hərbi əməliyyatlar nəticəsində mülki əhali arasında itki verdiyinə görə, Rusiya və Ukrayna xalqlarına başsağlığı verir.

Bu yaxınlarda Azərbaycan 30 il erməni hərbi birləşmələri tərəfindən işğal edilmiş ərazilərinin azad olunmasının ildönümünü qeyd edib.

Bir milyon qaçqın və məcburi köçkünü, Vətən uğrunda canını vermiş minlərlə gəncin ölümünü, yüzlərlə dağıdılmış şəhər və kəndləri Azərbaycan xalqının yaddaşından silmək mümkün deyil.

Bütün bu illər ərzində Azərbaycan bir çox ölkə və beynəlxalq təşkilatların ədalətsiz yanaşması ilə üzləşib, aqressora təzyiq etmək üçün lazımi sanksiyalar qoyulmayıb. Hətta bu gün, Azərbaycan erməni işğalçıları tərəfindən məhv edilmiş kommunikasiyaları bərpa etdiyi bir zamanda Avropa Parlamenti Azərbaycana qarşı növbəti qərəzli qətnamə qəbul edib.

Bütün bu illər ərzində ABŞ və onun müttəfiqləri nə vaxtsa qardaş olmuş Rusiya və Ukrayna xalqları arasında düşmənçilik yaratmağa çalışır.

Əgər ölkə başdan ayağa kimi xarici silahla silahlandırılırsa, yeniyetmələr Rusiyaya qarşı faşist və millətçi baxımdan tərbiyə edilirsə, adamlar həbsxanalardan azadlığa buraxılır və guya Ukraynanın suverenliyinin müdafiəsi məqsədilə silahlandırılırsa bu ölkəni nə gözlədiyini təsəvvür etmək çətin deyil.

Səkkiz ildir ki, Böyük Vətən Müharibəsi zamanı qazanılan qələbəni Ukrayna xalqının yaddaşından silməyə çalışıblar, faşist ideologiyasınn daşıyıcısı Stepan Banderanın portretləri ilə qəhrəman şəhər olan Kiyevin mərkəzi küçələri ilə yürüşlər keçirilib.

Donbas xalqı buna dözə bilməyib, səkkiz ildir zirzəmilərdə Ukrayna artilleriyasının həmlələri altında yaşayıb.

Azərbaycanın Rusiya icması ictimaiyyəti Rusiyaya anlayış göstərməyə çağırır. Rusiya ölkəsinin təhlükəsizliyini təmin etməyə, NATO-nun şərqə tərəf böyüməsinin qarşısını almağa çalışır. Biz Ukraynaya və Ukrayna xalqına sülh və Rusiya ilə mövcud dostluğu bərpa etməyi arzulayırıq. Biz əminik ki, o gün gələcək".

Azərbaycan Rus İcmasının sədri Milli Məclisin I, II, III, IV və V çağırış deputatı Mixail Zabelindir.

Amma Rus icmasının bu bəyanatı bir çox Azərbaycan rusları tərəfindən hiddətlə qarşılanın. Məsələn,

"Report"a açıqlamasında futbol üzrə Azərbaycan milli komandasının sabiq həkimi Boris Xetaqurov Azərbaycan Rus İcmasının sədri, Milli Məclisin deputatı Mixail Zabelinin Rusiyanın Ukraynaya hərbi müdaxiləsinə haqq qazandıran bəyanatından hiddətləndiyini bildirib.

"Birincisi, ümumiyyətlə, bu mövqedə olan bir icma Azərbaycanda niyə fəaliyyət göstərir? Bu icma, əksinə, Azərbaycan xalqını, dövlətimizin, Prezidentimizin apardığı siyasətini dəstəkləməlidir. Digər tərəfdən, o, Milli Məclisin deputatıdır. Onun Rusiyaya haqq qazandırması ilə qətiyyən razı deyiləm. Hazırda Ukraynanın işğalı aparılır".

Onun fikrincə, Zabelinin Milli Məclisə namizədliyini irəli sürənlər və deputat seçənlər yığışmalı, ondan izahat tələb etməlidirlər:

"Çünki o, bütün rusları zərbə altında qoyur. Onlar rus deyillər, Azərbaycan vətəndaşlarıdırlar. Mən Rusiyadan gələrək, Azərbaycanda müvəqqəti yaşayanları rus hesab edirəm. Azərbaycan vətəndaşı olan ruslar Azərbaycan dövlətinin və Prezident İlham Əliyevin siyasətini tam dəstəkləyirlər. Zabelin isə Azərbaycan dövləti və onun Prezidentinin mövqeyinin əleyhinə addım atır. Ona görə də seçicilər Zabelindən izahat tələb etməli, belə müraciətə imza atıbsa, Milli Məclisdən geri çağırılması üçün müraciət etməlidirlər. Belə praktikalar olur".

Gülnar Nazimqızı

www.anews.az

Xəbəri bəyəndiniz?

Sosial şəbəkələrdə paylaş