Cəbhədə gərginlik: Güclü atışma gedir

Evlərin damları və həyətlər güllə baran edilir.

Tovuzun Əlibəyli kəndində güclü atışma gedir.

Kənd icra nümayəndəsi Valeh Rzayevin APA-ya  verdiyi məlumata görə, bu gün saat 15-16 radələrində ara-sıra atışma səsləri eşidilsə də, saat 18 radələrindən başlayaraq ermənilər kəndi iri çaplı silahlardan atəşə tuturlar.

V. Rzayev bildirib ki, hələ ki, xoşbəxtlikdən xəsarət alan olmasa da evlərin damları və həyətlər güllə baran edilir. İcra nümayəndəsi erməni silahlı qüvvələrinin sabah keçiriləcək monitorinq öncəsi təxribat yaratdıqlarını deyir.

Qeyd edək ki, ATƏT-in fəaliyyətdə olan sədrinin şəxsi nümayəndəsinin mandatına uyğun olaraq, aprelin 15-də Tovuz rayonu Əlibəyli kəndinin yaxınlığındakı qoşunların təmas xəttində monitorinq keçirilməsi planlaşdırılır.

Monitorinqi Azərbaycan tərəfdə ATƏT-in fəaliyyətdə olan sədrinin şəxsi nümayəndəsi Anjey Kasprşik, səhra köməkçiləri Yevgeni Şarov və Piter Svedberq keçirəcəklər.

Təmas xəttinin qarşı tərəfində isə monitorinqi ATƏT-in fəaliyyətdə olan sədrinin şəxsi nümayəndəsinin səhra köməkçiləri Xristo Xristov və Jiri Aberle keçirəcəklər.

ANN.Az