XİN: Beynəlxalq təşkilatçılar bayrağı yandıran şəxsi cəzalandırmalıdır

Azərbaycan Xarici İşlər Nazirliyi İrəvanda keçirilən Avropa çempionatı zamanı Azərbaycan bayrağının yandrılmasını  nifrət aktı adlandırıb  və təşkilatçıları bayrağı yandıran şəxsi cəzalandırmağa çağırıb. Bu barədə XİN-in açıqladığı bəyanatda deyilir.


"Ermənistanda Azərbaycana qarşı etnik zəmində kök salmış nifrətin təcəssümü olan bu aktı qətiyyətlə pisləyirik.Ermənistan hökuməti tədbiri təşkil edən tərəf kimi bu kimi hadisələrin qarşısını vaxtında almalı və müvafiq təhlükəsizlik tədbirləri görməli idi. Bu aktı törətmiş şəxs ilkin olaraq saxlanılsa da, onun sonradan təmtəraqlı alqışlarla azad edilməsi ciddi narahatlıq doğurur.Ermənistan tərəfi nifrət zəminində bu cinayəti törətmiş şəxsi dərhal məsuliyyətə cəlb etməlidir",- bəyanatda qeyd olunub.


Azərbaycan XİN Beynəlxalq Ağırlıqqaldırma Federasiyası, Beynəlxalq Olimpiya Komitəsi və digər aidiyyəti beynəlxalq qurumlar tərəfindən idman yarışları üzrə qəbul edilmiş davranış qaydalarının kobud pozuntusu olan bu hərəkəti qəti şəkildə pisləməyə, qaydalar çərçivəsində təşkilatçılara qarşı müvafiq cəza tədbirlərinin görülməsinə çağırırıq.