“El” Hərəkatının sədr müavini Milli Şuradan istefa verib

“Azəri-Talış” Birliyinin sədri, “El” Hərəkatının sədr müavini Mehdibəy Səfərov Milli Şuradan istefa verib.Bununla bağlı APA-ya göndərdiyi bəyanatda M. Səfərov istefasının səbəblərini açıqlayıb. O bildirib ki, Milli Şurada ayrı-seçkiliyə yol verilib: “Demokratik Qüvvələrin Milli Şurasının fəaliyyətinin ana xətti vətənimizdə dilindən, dini və milli mənsubiyyətindən asılı olmayaraq, azad, demokratik və bərabərhüquqlu vətəndaş cəmiyyəti quruculuğu olduğundan “Azəri-Talış” İctimai Birliyi də, bu dəyərləri rəhbər tutaraq, mənim Milli Şurada təmsil olunmağıma qərar verdi. Lakin ciddi səy və təkliflər irəli sürməyimə baxmayaraq, yuxarıda sadaladığım dəyərlərin heç biri (nəzəri cəhətdən olsa belə) MŞ-nın fəaliyyət proqramına daxil edilmədi. Əksinə, milli-etnik ayrı-seçkiliyə yönəlik çağırışlar edən və təklif etdiyim müstəqil fikirlərə dözümsüzlük göstərərək, məni və mənsub olduğum xalqı təhqir edən bəzi insanlar MŞ-nın Koordinasiya Şurasında təmsil olundular. Dəfələrlə bu barədə şifahi, eləcə də yazılı müraciətlər etsəm də, MŞ rəhbərliyi tərəfindən bu xüsusda heç bir əməli tədbir görmədi. Etiraf etməliyəm ki, Eldəniz Quliyevin MŞ ilə bağlı böyük ümidləri son aylar məni bu ittifaqa bağlayan yeganə tellər idi. Təəssüflər olsun ki, fundamental insan hüquq və azadlıqlarının qorunması ilə bağlı MŞ-dan gözləntilərim özünü doğrultmadı. Mən, Eldar Namazovun EL Hərəkatındakı ciddi iş qrafiki ilə əlaqədar yaranmasında müstəsna zəhməti olan MŞ-dakı fəaliyyətinə xitam verməsindən sonra, ona qarşı sərgilənən qərəzli və aşağılayıcı ifadələri də bu sıraya aid edirəm. Qeyd etdiyim məsələləri əsas gətirərək, artıq Milli Şurada fəaliyyətimi mümkünsüz hesab edirəm və 6 fevral 2014-cü il tarixdən etibarən, bu siyasi qurumda öz fəaliyyətimə xitam verirəm. MŞ-ya və orada fəaliyyətlərini davam etdirən dostlara gələcək işlərində uğurlar arzulayıram”. ANN.Az