Ermənistan Parlamenti birinci oxunuşda “Ermənistanın Avropa İttifaqına qoşulma prosesinin başlanması haqqında” qanun layihəsini qəbul edib. Səsvermədə 63 nəfər lehinə, 7 nəfər əleyhinə səs verib, bitərəf qalan olmayıb.
Müxalifət fraksiyası “Hayastan” səsvermədə iştirak etməyəcəyini bəyan edib, ikinci ən böyük müxalifət fraksiyası “Şərəfim var” isə layihəyə qarşı səs verib.
Müxalifət bu prosesi "fars" adlandırıb və səsvermədə iştirak etməyəcəyini bildirib.
Qanun layihəsi bir gün əvvəl təşəbbüskarlarından biri, keçmiş ədliyyə naziri və Qərbyönlü "Respublika" partiyasının siyasi şurasının üzvü Artak Zeynalyan tərəfindən təqdim olunub.
Müvafiq təşəbbüslə çıxış edən ictimai və siyasi təşkilatlar 60 min imza toplayıblar (Ermənistan Konstitusiyasına əsasən, vətəndaş cəmiyyəti tərəfindən təqdim olunan qanun layihələri parlamentdə müzakirəyə çıxarıla bilər, əgər azı 50 min vətəndaşın imzası toplanarsa).
Layihə 2025-ci ilin yanvarında hökumət tərəfindən təsdiq edilib. Baş nazir Nikol Paşinyan əvvəlcədən bildirmişdi ki, bu addım Ermənistanın avtomatik olaraq Aİ-yə üzv olması demək deyil, çünki belə bir qərar referendum yolu ilə qəbul edilməlidir. Daha sonra o, Ermənistanın “Avrasiya İqtisadi İttifaqında özünü pis hiss etmədiyini”, İranla münasibətlərin dərinləşdirilməsində maraqlı olduğunu, lakin eyni zamanda "xalqın müəyyən və həssas bir hissəsinin” ölkənin gələcəyi üçün Avropa seçimi etmək istədiyini bəyan edib.
Ermənistan hökumətinin qərarına münasibət bildirən Kreml isə eyni anda həm Avrasiya İqtisadi İttifaqının, həm də Aİ-nin üzvü olmağın mümkünsüz olduğunu vurğulayıb. Rusiya Baş nazirinin müavini Aleksey Overçuk bildirib ki, Rusiya bu qanun layihəsinin müzakirəsini “İrəvanın Aİİ-dən çıxışının başlanğıcı” kimi görür və Ermənistanın qərarını “Titanik üçün bilet almaq” ilə müqayisə edib.
N.Təbrizli
Foto
Video
