Azər Əmiraslanov: Müstəqil siyasətin əsası iqtisadi dayanıqlıqdır

Azərbaycanın müstəqil siyasət yürütməsi onun iqtisadi dayanıqlığı ilə birbaşa bağlıdır. Bunu Milli Məclisin deputatı Azər Əmiraslanov oktyabrın 22-də İqtisadi siyasət, sənaye və sahibkarlıq komitəsinin elmi-praktim konfransında bildirib.

"Dünyanın hər yerində dövlət suverenliyi ali prinsip kimi qəbul olunur. Suverenlik isə ilk növbədə müstəqil qərarvermə və siyasət yürütmək bacarığıdır. Bunun üçün isə iqtisadi əsasların möhkəm olması vacibdir", – Əmiraslanov vurğulayıb.

Onun sözlərinə görə, Prezident İlham Əliyevin dəfələrlə qeyd etdiyi kimi, Azərbaycan bu gün tam müstəqil siyasət aparan dövlətlərdən biridir.

"Bu illər ərzində ölkə iqtisadiyyatı güclənib, bir sıra strateji sənədlər qəbul olunub. Həmin sənədlər Azərbaycanın uzunmüddətli inkişafında və iqtisadi təhlükəsizliyində mühüm rol oynayıb", – deputat əlavə edib.

Azərbaycan iqtisadiyyatı son 20 ildə mühüm transformasiyalardan keçib. 2003–2025-ci illər arasında ÜDM-də kəskin artım müşahidə olunub, xarici borc səviyyəsi aşağı, strateji valyuta ehtiyatları isə sabit qalıb. Eyni zamanda, ölkə enerji sektoruna əsaslanaraq qeyri-neft sektorunun inkişafına da önəm verib.

Azərbaycan 2025-ci ilin ilk dövründə 35,4 milyard dollar həcmində xarici ticarət dövriyyəsi həyata keçirib və bu da iqtisadi dayanıqlığın göstəricilərindən biri kimi qiymətləndirilir.

Gülnar Nazimqızı