TÜİB: Qarabağda 10 min nəfərlik məşğulluq layihəsi planlaşdırılır

Qarabağda 10 minə yaxın vətəndaşın məşğulluğunu nəzərdə tutan investisiya layihələri müzakirə olunur. Bunu Türkiyə və Azərbaycan İş Adamları və Sənayeçiləri İctimai Birliyinin sədri Hüseyn Büyükfırat jurnalistlərə açıqlamasında bildirib.

"Qarabağda genişmiqyaslı investisiya layihələri ilə bağlı danışıqlar davam edir. Hazırda bölgəyə qayıdan əhalinin məşğulluğunun təmin edilməsinə yönəlmiş və 5–10 min nəfərin işlə təmin olunmasını nəzərdə tutan layihələr üzərində iş aparılır. Sözügedən layihələrlə bağlı rəsmi açıqlamanın qarşıdakı forumda veriləcək",- o bildirib.

TÜİB rəhbəri bildirib ki, regionda yeni yolların istismara verilməsi, Orta Dəhlizin aktivləşməsi və İpək Yolunun canlanması əraziyə əlavə iqtisadi üstünlüklər qazandırır. Bu çərçivədə Azərbaycanın investisiya mühiti Türkiyədə və digər ölkələrdə potensial investorlar üçün aktiv şəkildə tanıdılır.

"Türkiyədə bəzi sahələrdə bazarın daralması fonunda Azərbaycan, xüsusilə də Qarabağ bölgəsi tekstil və digər istehsal sektorları üçün yeni alternativ olaraq diqqət çəkir. Bu istiqamətdə Ticarət Müşavirliyi, Azpromo və aidiyyəti dövlət qurumları ilə birgə əməkdaşlıq aparılır",- o vurğulayıb.
 

Aytac