Simonyan ümid edir ki, İstanbulda azərbaycanlı həmkarı ilə görüşəcək

İrəvan Azərbaycan parlament nümayəndə heyəti ilə gələcək geniş formatlı təmasları istisna etmir. Bunu Ermənistan Milli Assambleyasının spikeri Alen Simonyan bildirib. 

O vurğulayıb ki, hazırda rəsmi gündəmdə konkret razılaşdırılmış görüş olmasa da, İstanbulda keçiriləcək Parlamentlərarası İttifaqın (PİU) növbəti konfransı çərçivəsində belə bir görüşün baş tuta biləcəyi ehtimalı yüksəkdir.

Simonyan Beynəlxalq İnsan Hüquqları Günü münasibətilə təşkil olunan tədbirdə jurnalistlərin suallarını cavablandırarkən deyib ki, Ermənistan və Azərbaycan parlamentariləri arasında dialoqun bərpası üçün bütün beynəlxalq platformalardan istifadə etmək niyyətindədirlər.

“Azərbaycanlı həmkarım bu təmasların məntiqini müsbət qiymətləndirir. Hələlik konkret danışıqlar aparılmayıb, lakin İstanbulda görüş ehtimalı var”, – o bildirib.

 Simonyan qeyd edib ki, tərəflərin mövqeləri gələcək görüşlər zamanı daha ətraflı müzakirə ediləcək.

Aytac