Baş prokuror gənclərin kriminalistika biliklərinin zəifliyindən narahatdır

Son illər prokurorluq orqanlarında qulluğa qəbul olunan gənclərin əhəmiyyətli hissəsinin kriminalistika sahəsində bilik və bacarıqları ya çox zəifdir, ya da ümumiyyətlə yoxdur, bunu Baş prokuror Kamran Əliyev Bakıda keçirilən “LEGIS” Beynəlxalq Hüquq Forumunda bildirib.

Əliyevin sözlərinə görə, ali təhsil müəssisələrində kriminalistikanın seçmə fənn kimi tədris olunması və tələbələrin böyük qisminin bu fənni seçməməsi sonradan praktik fəaliyyətdə ciddi çətinliklər yaradır.

“Kriminalistik taktika və texnika barədə məlumatı olmayan şəxsin faktlar üzrə səmərəli araşdırma aparması mümkün deyil,” — Baş prokuror qeyd edib.

O bildirib ki, rəqəmsallaşmanın sürətləndiyi mövcud mərhələdə hüquq fakültəsi tələbələrinin rəqəmsal savadlılığının artırılması da prioritet məsələlərdən biridir.

Baş prokurorun açıqlamasına görə, 2025-ci ildə keçirilən imtahanlarda 349 namizəd (259 kişi, 90 qadın) prokurorluq orqanlarında qulluğa qəbul üçün iştirak edib. Onlardan yalnız 51 nəfər müvəffəqiyyət qazanaraq işə qəbul olunub ki, bu da təxminən 14,6% qəbul göstəricisi deməkdir. Qəbul olunanlardan yalnız bir nəfər istisna olmaqla, digərləri ölkənin hüquq fakültələrinin məzunları olub.

Əliyev vurğulayıb ki, prokurorluq orqanlarında fəaliyyətə başlamaq üçün qanunvericilikdə hüquq stajı tələbi nəzərdə tutulmur və ali təhsili yeni bitirmiş hüquqşünaslar birbaşa müsabiqədə iştirak edə bilirlər.

Gülnar Nazimqızı