Prezident Kral III Çarlzı təbrik edib

Azərbaycan Prezidenti İlham Əliyev Böyük Britaniya və Şimali İrlandiya Birləşmiş Krallığının Kralı III Çarlza ölkənin milli bayramı — Kralın Təvəllüd Günü münasibətilə təbrik məktubu göndərib.

Prezident İlham Əliyev məktubunda Britaniya Kralını və xalqını təbrik edib, xoş arzularını çatdırıb.

Məktubda Azərbaycan ilə Böyük Britaniya arasında münasibətlərin dostluq, qarşılıqlı hörmət və etimada əsaslandığı vurğulanır. Dövlət başçısı siyasi, iqtisadi-ticari, investisiya, enerji və xüsusilə bərpaolunan enerji sahələrində əməkdaşlığın inkişaf etdiyini qeyd edir.

İlham Əliyev iki ölkə arasında əlaqələrin mövcud potensialdan istifadə etməklə daha da genişləndirilə biləcəyini bildirib.

Prezident həmçinin qarşılıqlı əməkdaşlığın davam etdiriləcəyinə əminliyini ifadə edib və münasibətlərin xalqların rifahına töhfə verdiyini qeyd edib.

Məktubun sonunda Azərbaycan Prezidenti III Çarlza möhkəm cansağlığı, uzun ömür və uğurlar, Böyük Britaniya xalqına isə rifah və firavanlıq arzulayıb.