Zelenski İlham Əliyevə təşəkkür edib

Ukrayna Prezidenti Volodimir Zelenski ölkəsinin Müstəqilliyinin 35-ci ildönümü münasibətilə təbrikinə görə Azərbaycan Prezidenti İlham Əliyevə təşəkkür edib.Zelenski bu barədə “X” sosial şəbəkəsində paylaşım edib.

Ukrayna Prezidenti Azərbaycanın Ukraynanın suverenliyi və ərazi bütövlüyünə dəstək məsələsində mövqeyinin hər zaman qətiyyətli olduğunu bildirib.

“Azərbaycanın Ukraynanın suverenliyi və ərazi bütövlüyü ilə bağlı mövqeyi hər zaman qətiyyətli olub və buna görə də biz bunu həmişə yüksək qiymətləndirmişik”, - Zelenski qeyd edib.

O bildirib ki, Ukrayna və Azərbaycan iqtisadi əməkdaşlığı inkişaf etdirməyə, energetika və təhlükəsizlik sahələrində yeni əməkdaşlıq istiqamətlərini araşdırmağa davam edir.

Zelenskinin sözlərinə görə, iki ölkə zərurət yarandıqda bir-birinə dəstək göstərir.

“Əminəm ki, Ukrayna ilə Azərbaycan arasında dostluq, qarşılıqlı hörmət və strateji tərəfdaşlıq bundan sonra da möhkəmlənəcək”, - Ukrayna Prezidenti vurğulayıb.