Azərbaycan və Türkiyə geosiyasi risklər fonunda addımlarını koordinasiya etməlidir - deputat

Azərbaycan və Türkiyə regionda artan geosiyasi və təhlükəsizlik riskləri fonunda öz addımlarını maksimum dərəcədə koordinasiya etməlidir. Bunu Milli Məclisin deputatı Fariz İsmayılzadə bazar ertəsi Bakıda bildirib.

“Dünyada iki böyük müharibə – Rusiya-Ukrayna və Yaxın Şərq müharibələri davam edir. Hər ikisi Azərbaycan və Türkiyəyə yaxın regionlarda baş verir”, – İsmayılzadə “Türk Dünyası Dialoqları: Ortaq Gələcək, Ortaq Vizyon” panelində deyib.

Onun sözlərinə görə, münaqişələr fonunda yeni geosiyasi düzənin və təhlükəsizlik arxitekturasının necə formalaşacağı hələ aydın deyil və bu proses həm Azərbaycan, həm də Türkiyə üçün yeni risklər yaradır.

İsmayılzadə bildirib ki, Azərbaycanla Türkiyə arasında 2021-ci ildə imzalanmış Şuşa Bəyannaməsi iki ölkənin təhlükəsizliyini bir-biri ilə sıx əlaqələndirir.

Deputat əlavə edib ki, qlobal dəyişikliklər risklərlə yanaşı, Türkiyə üçün yeni imkanlar da açır. O, Türkiyə ilə Pakistan arasında əməkdaşlığın genişlənməsini və Yaxın Şərqdə yeni ittifaqların yaranmasını buna nümunə göstərib.

İsmayılzadənin sözlərinə görə, Hörmüz boğazı ətrafındakı proseslər enerji marşrutlarının dəyişməsinə səbəb ola və bəzi ərəb ölkələrinin neft kəmərlərini Türkiyə üzərindən çəkməsinə imkan yarada bilər.

“Ümid edirəm ki, Azərbaycan və Türkiyə bu yeni geosiyasi proseslərdən daha güclü çıxacaq”, – o deyib.

Gülnar Nazimqızı