Türkiyə Azərbaycanla 15 milyardlıq ticarət dövriyyəsi hədəfinə tezliklə çatmağı planlaşdırır - nazir

Türkiyə və Azərbaycan qarşılıqlı ticarət dövriyyəsini ən qısa müddətdə 15 milyard dollara çatdırmaq üçün fəaliyyətlərini davam etdirirlər. Bunu Türkiyənin xarici işlər naziri Hakan Fidan bazar ertəsi Bakıda bildirib.

“Qarşılıqlı investisiyalarımız, ortaq layihələrimiz və ticarət dövriyyəmiz hər il artır. Prezidentlərimizin müəyyən etdiyi 15 milyard dollarlıq ticarət dövriyyəsi hədəfinə ən qısa zamanda çatmaq üçün bütün qurumlarımız çalışır”, - Fidan azərbaycanlı həmkarı Ceyhun Bayramovla birgə mətbuat konfransında deyib.

O bildirib ki, enerji, nəqliyyat və bağlantı sahələrində əməkdaşlıq iki ölkə arasındakı münasibətlərin strateji istiqamətlərindəndir.

Fidanın sözlərinə görə, Türkiyə Bakı-Tbilisi-Qars dəmir yolunu Orta Dəhlizin mühüm tərkib hissəsi hesab edir və marşrutdan daha səmərəli istifadə olunmasını istəyir.

Nazir, həmçinin iki ölkənin müdafiə və təhlükəsizlik sahələrində əməkdaşlığı genişləndirmək niyyətində olduğunu bildirib. Onun sözlərinə görə, bu əməkdaşlığa birgə hərbi təlimlər, təhsil və təcrübə mübadiləsi, eləcə də müdafiə sənayesi müəssisələri arasında tərəfdaşlıq daxildir.
Fidan Azərbaycan və Ermənistan arasında sülh prosesində əldə olunan irəliləyişi alqışlayaraq, prosesin tamamlanmasının Cənubi Qafqazda yeni əməkdaşlıq dövrü yaradacağına ümid etdiyini deyib.

“Cənubi Qafqazın münaqişələrlə deyil, sülh, nəqliyyat, enerji, ticarət və iqtisadi inkişafla xatırlanmasını istəyirik”, - o bildirib.

Gülnar Nazimqızı