Ramiz Mehdiyevin məhkəməsi başlayır

Prezident Administrasiyasının sabiq rəhbəri Ramiz Mehdiyevin cinayət işi üzrə məhkəmənin hazırlıq iclası bu gün Bakı Ağır Cinayətlər Məhkəməsində keçiriləcək.

İclasa hakim Murad Aslanov sədrlik edəcək.

Ramiz Mehdiyev və sabiq köməkçisi Eldar Əmirovun cinayət işinə birlikdə baxılacaq. İttiham aktına əsasən, Mehdiyev Cinayət Məcəlləsinin 193-1.3.2-ci (cinayət yolu ilə əldə edilmiş əmlakı leqallaşdırma), 274-cü (dövlətə xəyanət) və 278.1-ci (dövlət hakimiyyətini ələ keçirməyə yönələn əməllər) maddələri ilə ittiham olunur.

İttihama görə, Mehdiyev 2025-ci ilin avqust-sentyabr aylarında dövlət hakimiyyəti əleyhinə gizli plan və fəaliyyət istiqamətlərini əks etdirən “Dövlət idarəetmə sisteminin yenidən qurulması haqqında təkliflər” adlı material hazırlayıb və onun Əli Kərimliyə təqdim edilməsini təşkil edib.

İttiham aktında həmçinin Mehdiyevin xarici xüsusi xidmət orqanlarının köməyi ilə dövlət hakimiyyətinin ələ keçirilməsinə və konstitusiya quruluşunun zorla dəyişdirilməsinə yönələn fəaliyyətlərdə iştirak etdiyi, habelə dövlətə xəyanət etdiyi bildirilir.

Bundan başqa, ittihama əsasən, o, 2025-ci il oktyabrın 13-dək cinayət yolu ilə əldə edilmiş 17 milyon manatdan artıq vəsaiti leqallaşdırıb.

Ramiz Mehdiyev barəsində cinayət işi Dövlət Təhlükəsizliyi Xidmətində 2025-ci ilin oktyabrında başlanıb. Onun barəsində ev dustaqlığı qətimkan tədbiri seçilib və tədbirin müddəti sonradan uzadılıb.