Deputat: Sarkisyan və Koçaryan BMT-də çıxış edərkən neçə müsəlman lideri zalı tərk edib?

Azərbaycanın Fələstin məsələsində iki dövlətli həlli, daimi atəşkəsi və humanitar yardımları ardıcıl dəstəkləməsi İsrailin Baş naziri Benyamin Netanyahunun BMT-dəki çıxışı zamanı zalın tərk edilməsindən daha əhəmiyyətlidir. Bunu deputat Zahid Oruc Milli Məclisdə çıxışı zamanı deyib.

“Serj Sarkisyan və Robert Koçaryan Baş Assambleyada çıxış edərkən Xocalı qətliamına görə neçə müsəlman lideri və aparıcı Qərb dövlətinin təmsilçisi Nyu-Yorkdakı zalı tərk edib?” - deputat bildirib.

Onun sözlərinə görə, Azərbaycanın 30 ilə yaxın davam edən işğal dövründə Qəzza məsələsinə göstərilən səviyyədə beynəlxalq etiraz və yardım siyasəti müşahidə edilməyib.

“Müharibə qurbanlarına dəstək yalnız bəyanat, qətnamə qəbulu və zalı tərk etməklə ölçülmür. Həmrəylik dağıdılmış şəhərləri, məktəbləri, xəstəxanaları və insanların həyatını yenidən qurmaqla sübut olunur”, - Zahid Oruc deyib.

Zahid Oruc, həmçinin Ermənistanla münasibətlərin normallaşmasından sonra yaranacaq gömrük, tranzit, sərhəd ticarəti və sığorta münasibətləri üçün hüquqi bazanın indidən hazırlanmasını təklif edib.

“Sabah sərhədlər açılarsa, hansı gömrük rejimi işləyəcək, tranzit yüklərin hüquqi və sığorta təminatı necə olacaq?” - o bildirib.

Deputatın sözlərinə görə, yeni mərhələdə enerji xətlərinin, dəmir yollarının, rəqəmsal kommunikasiya şəbəkələrinin və beynəlxalq nəqliyyat dəhlizlərinin təhlükəsizliyinin təmin olunması da qanunvericilikdə əksini tapmalıdır.

O, parlamentin payız sessiyasında BMT-nin müvafiq institutlarının iştirakı ilə Azərbaycanın ərazi bütövlüyünü bərpa etməsinin nəticələrinə, eləcə də Cənubi Qafqazda sülh və inteqrasiyaya həsr olunan ardıcıl tədbirlərin keçirilməsini təklif edib.

Gülnar Nazimqızı