Ceyhun Bayramov Gürcüstanın Azərbaycana yeni təyin olunmuş səfirini qəbul edib

Azərbaycanın xarici işlər naziri Ceyhun Bayramov Gürcüstanın Azərbaycana yeni təyin olunmuş səfiri Qiorqi Zakaraşvilini qəbul edib.Bu barədə Azərbaycan Xarici İşlər Nazirliyi məlumat yayıb.

Görüşdə Azərbaycan-Gürcüstan münasibətlərinin cari vəziyyəti və inkişaf perspektivləri, iqtisadi-ticarət əlaqələri, enerji təhlükəsizliyi, nəqliyyat-kommunikasiya layihələri, müdafiə və təhlükəsizlik sahələrində əməkdaşlıq məsələləri müzakirə olunub.

Tərəflər iki ölkə arasında enerji və nəqliyyat sahələrində həyata keçirilən birgə layihələrin, o cümlədən Bakı-Tbilisi-Ceyhan neft kəməri, Cənub Qaz Dəhlizi, Bakı-Tbilisi-Qars dəmir yolu və Orta Dəhlizin regional və qlobal əhəmiyyətini qeyd ediblər. Həmçinin Qara dənizin sualtı elektrik enerjisi kabeli kimi "yaşıl enerji" layihələri barədə fikir mübadiləsi aparılıb.

Ceyhun Bayramov postmünaqişə dövründə regionda yaranmış vəziyyət, Azərbaycanın işğaldan azad edilmiş ərazilərində həyata keçirilən bərpa və quruculuq işləri, eləcə də Azərbaycan-Ermənistan sülh və normallaşma prosesi barədə səfirə məlumat verib.

Nazir səfirə yeni vəzifəsində uğurlar arzulayıb.

Qiorqi Zakaraşvili isə iki ölkə arasında strateji tərəfdaşlığın daha da inkişaf etdirilməsi üçün səylərini əsirgəməyəcəyini bildirib.

Görüşdə qarşılıqlı maraq doğuran digər ikitərəfli və regional məsələlər də müzakirə olunub.