Azərbaycanda şəxsiyyəti müəyyənləşdirilən 273 itkinin qalıqları ailələrinə təhvil verilib

Birinci Qarabağ müharibəsində itkin düşmüş 273 Azərbaycan vətəndaşının qalıqları ailələrinə təhvil verilərək dəfn edilib. Bu barədə Əsir və itkin düşmüş, girov götürülmüş vətəndaşlarla əlaqədar Dövlət Komissiyasının sədri Əli Nağıyev bildirib.

İyunun sonuna olan məlumata görə, 226 nəfərin qalıqları ailələrinə təhvil verilmişdi. Beləliklə, həmin vaxtdan bu göstərici 47 nəfər artıb.

Nağıyevin sözlərinə görə, məhkəmə molekulyar-genetik ekspertizaları nəticəsində ümumilikdə Birinci Qarabağ müharibəsində itkin düşmüş 328 nəfərin şəxsiyyəti müəyyənləşdirilib.

Qalıqları ailələrinə təhvil verilən 273 nəfərdən 225-i hərbçi, 48-i mülki şəxsdir. Mülki şəxslərdən 15-i qadın, ikisi azyaşlıdır.

İtkin düşmüş şəxslərin axtarışı və qalıqların eyniləşdirilməsi istiqamətində işlər davam etdirilir.

Azərbaycanda Qarabağ münaqişəsi nəticəsində itkin düşmüş ümumilikdə 4 010 nəfər qeydiyyatdadır.
 

Aytac Zeynalova