50 itkin erməninin DNT profili aşkarlanan qalıqlarla uyğun gəlməyib

Ermənistanın bu ilin yanvarında təqdim etdiyi itkin düşən 50 erməniəsilli şəxsin DNT profilləri ilə Azərbaycanda aşkarlanmış insan qalıqları arasında uyğunluq müəyyən edilməyib. Bunu çərşənbə axşamı Əsir və itkin düşmüş, girov götürülmüş vətəndaşlarla əlaqədar Dövlət Komissiyasının sədri Əli Nağıyev bildirib.

“Ermənistanın 2026-cı ilin yanvarında təqdim etdiyi, itkin düşdüyü bildirilən 50 erməniəsilli şəxsin DNT profilləri ilə aşkarlanmış qalıqlar arasında ekspertizalar uyğunluq müəyyən etməyib”, - Nağıyev Bakıda keçirilən beynəlxalq konfransda deyib.

Onun sözlərinə görə, Azərbaycan işğaldan azad edilmən ərazilərdə aşkarlanan və Ermənistan hərbçilərinə aid olduğu ehtimal edilən qalıqların eyniləşdirilməsi üçün Ermənistan tərəfinə müvafiq DNT nümunələrinin təqdim olunmasını təklif edib.

Nağıyev bildirib ki, Bakı hər iki tərəfin itkin düşmüş şəxslərinin taleyinin aydınlaşdırılması üçün İrəvanla əməkdaşlığı davam etdirməyə hazırdır.

Azərbaycan və Ermənistanın müvafiq komissiyaları arasında birbaşa təmaslar 2025-ci ilin fevralında qurulub.

Aytac Zeynalova