Dünyada itkinlərin sayı artır — ICMP

Dünyada silahlı münaqişələrin, miqrasiya böhranlarının, təbii fəlakətlərin və iqlim dəyişikliklərinin artması fonunda itkin düşən şəxslərin sayı artır. Bunu İtkin Düşmüş Şəxslər üzrə Beynəlxalq Komissiyanın (ICMP) baş direktoru Ketrin Bomberger bildirib.

“Bu gün 1946-cı ildən bəri ən çox sayda münaqişənin şahidi oluruq”, — Bomberger Bakıda keçirilən beynəlxalq konfransda Norveç Sülh Araşdırmaları İnstitutunun (PRIO) məlumatlarına istinadən deyib.

Onun sözlərinə görə, Qərbi Balkanların təcrübəsi DNT texnologiyalarının itkin düşən şəxslərin kütləvi şəkildə axtarışı və identifikasiyasında effektivliyini göstərib. Keçmiş Yuqoslaviyadakı münaqişələr zamanı itkin düşmüş təxminən 40 min şəxsin 75%-dən çoxunun taleyinə aydınlıq gətirilib.

Bomberger eyni zamanda bildirib ki, şəxsin hansı şəraitdə itkin düşdüyünü müəyyən etmək üçün təkcə DNT analizi kifayət deyil. DNT şəxsiyyəti müəyyən etməyə imkan versə də, baş verənlərin aydınlaşdırılması üçün istintaq və məhkəmə-tibbi məlumatlar, onların düzgün sənədləşdirilməsi və saxlanılması, həmçinin dövlət qurumları arasında əməkdaşlıq lazımdır.

Aytac  Zeynalova