Humanitar hüququn tədrisi sülh zamanında da vacibdir - San Remo İnstitutu

Dövlətlər təkcə silahlı münaqişələr zamanı deyil, həm də dinc dövrdə beynəlxalq humanitar hüquq normalarının tədrisini təmin etməyə borcludurlar. Bunu Bakıda itkin düşmüş şəxslər mövzusunda keçirilən beynəlxalq konfransda Beynəlxalq Humanitar Hüquq İnstitutunun (San-Remo İnstitutu) baş katibi Can Luka Beruto bildirib.

O vurğulayıb ki, biliklərin yayılması və tədris həm sülh, həm də müharibə dövründə iştirakçı dövlətlərin birbaşa hüquqi öhdəliyidir. Müvafiq müddəalar 1949-cu ilin dörd Cenevrə Konvensiyasında təsbit olunub və 1977-ci il Əlavə Protokolları ilə daha da inkişaf etdirilib. Berutonun sözlərinə görə, itkin düşmüş şəxslər kontekstində bu cür hazırlıq aidiyyəti qurumların saxlanılan şəxslərin dəqiq uçotunu aparmağa, həlak olanlar barədə məlumatları qorumağa, ailələrlə əlaqələri təmin etməyə və beynəlxalq təşkilatlarla səmərəli əməkdaşlıq qurmağa hazır olmasını təmin etməlidir.

Baş katib San-Remo İnstitutunun bu istiqamətdə fəaliyyətini gücləndirdiyini və maraqlı tərəfdaşlarla birgə təşəbbüslər hazırlamağa hazır olduğunu qeyd edib.

Aytac Zeynalova