Azərbaycan və BMT arasında sosial sahədə əməkdaşlığın perspektivləri müzakirə olunub

BMT-nin Azərbaycandakı rezident əlaqələndiricisi Dmitro Şlapaçenko ilə Əmək və Əhalinin Sosial Müdafiəsi Nazirliyində görüş keçirilib.Bu barədə Əmək və Əhalinin Sosial Müdafiəsi Nazirliyindən məlumat verilib.

Görüşdə nazir Anar Əliyev Azərbaycanın BMT ilə sıx və davamlı tərəfdaşlığa xüsusi önəm verdiyini bildirib. O, Dmitro Şlapaçenkonun fəaliyyəti dövründə bu əməkdaşlığın daha da inkişaf edəcəyinə əminliyini ifadə edib.

Dmitro Şlapaçenko isə Azərbaycanda həyata keçirilən sosial islahatlar və sosial həssas qruplara dəstək istiqamətində BMT qurumları ilə nazirlik arasında əməkdaşlığın səmərəli olduğunu qeyd edib.

Görüşdə Azərbaycan hökuməti ilə BMT arasında 2026–2030-cu illər üzrə Dayanıqlı İnkişaf üzrə Əməkdaşlıq Çərçivəsinin əhəmiyyəti müzakirə olunub.

Tərəflər insan kapitalının inkişafı, layiqli əmək şəraitinin təşviqi və sosial müdafiə sisteminin gücləndirilməsi üzrə birgə fəaliyyət imkanları barədə fikir mübadiləsi aparıblar.