Vaşinqtonda Azərbaycan müzakirələri - FOTOLAR

Azərbaycanın ABŞ-dakı səfirliyində Vaşinqtonda yerləşən və mədəniyyətlər arasında dialoqun təşviqini dəstəkləyən "Rumi Forum" ilə birgə "Azərbaycan - inkişaf etməkdə olan regional güc: dünən, bu gün, sabah" mövzusunda dəyirmi masa təşkil edilib. 

Səfirlikdən ANN.Az-a verilən məlumata görə, tədbirdə bir sıra tanınmış analitik mərkəzlərin nümayəndələri və nüfuzlu ekspertlər iştirak ediblər.

"Rumi Forumun" direktoru Emre Çelik forumun fəaliyyəti və rəhbərlik etdiyi təşkilatın Azərbaycanla əməkdaşlığı barədə məlumat verib.

Bundan sonra çıxış edən səfir Elin Süleymanov mövzunun vacibliyini qeyd edərək, Azərbaycanın regionda liderə və uğurlu inkişafın nümunəsinə çevrildiyi, ölkəmizin dünya miqyasında artan rolu barədə danışıb. Bildirilib ki, Azərbaycan daim öz tərəfdaşlarına sadiqdir və qarşılıqlı olaraq onlardan eyni münasibət gözləyir.Tədbirdə moderator qismində çıxış edən ABŞ-da yerləşən Yaxın Şərq İnstitutunun eksperti, 31 oktyabr-1 noyabrda Bakıda keçirilmiş Beynəlxalq Humanitar Forumda iştirak etmiş Aleks Vatanka Azərbaycanın müstəqillik dövründə möhtəşəm nailiyyətlər əldə etdiyini bildirib. Amerikalı ekspert ölkəmizin bütün sahələrdə gözəçarpan dərəcədə inkişafını qeyd edərək, əhalisinin əksəriyyətini müsəlmanlar təşkil edən Azərbaycanın dünyəvi və tolerant dövlət olduğunu vurğulayıb. O, Azərbaycanın bir çox müsəlman dövlətləri üçün bu baxımdan nümunə ola biləcəyini ifadə edərək, Amerikalı siyasətçiləri ölkəmizin regiondakı artan roluna və apardığı siyasətə daha çox diqqət yetirməyə çağırıb.Bundan sonra tədbirin iştirakçıları arasında regionda gedən mühüm proseslər və ölkəmizin rolu barədə fikir mübadiləsi aparılıb. Tədbirdə iştirak etmiş ABŞ-ın ATƏT-in Minsk Qrupundakı keçmiş həmsədri səfir Keri Kavano Ermənistan-Azərbaycan Dağlıq Qarabağ münaqişəsinin həlli üzrə danışıqlar prosesi və onun həmsədr olduğu dövrdə şəxsi təcrübəsindən söz açıb.

ANN.Az