Daxili İşlər Nazirliyi (DİN) SOCAR Azərbaycan Qran-Prisinin başa çatması münasibətilə rəsmi məlumat yayıb.

Nazirliyin Mətbuat xidmətindən daxil olan məlumatda bildirilib ki, aprelin 26-da Bakı şəhərində start götürən Formula-1 üzrə dünya çempionatının dördüncü mərhələsi – SOCAR Azərbaycan Qran-Prisi aprelin 28-də uğurla və böyük təntənə ilə başa çatıb: "Yüz minlərlə yerli və əcnəbi azarkeşin böyük coşqu ilə izlədikləri bu möhtəşəm tədbirin hazırlanması, keçirilməsi zamanı Daxili İşlər Orqanlarının əməkdaşları digər hüquq-mühafizə orqanları ilə birlikdə ictimai təhlükəsizliyin və ictimai asayişin təmini sahəsində yüksək peşəkarlıq nümayiş etdiriblər. Respublika Daxili İşlər nazirinin imzaladığı müvafiq əmrlə üzərlərinə düşən vəzifələri, verilən tapşırıqları vaxtında və layiqincə yerinə yetirdiklərinə görə polis və Daxili Qoşunların 350 əməkdaşı müxtəlif növ mükafatlara layiq görülüblər"