Rusiyanın hansı bölgələrinə daha çox əsgər cənazəsi gətirilib?

Rusiya Müdafiə Nazirliyi itkiləri barədə ilk dəfə martın 2-də məlumat verib. Belə ki, müharibənin başlamasından bir həftə sonra hərbi qurum 498 hərbçisinin öldüyünü bildirib. O vaxtdan bəri heç bir yeni məlumat dərc olunmayıb.

Ukrayna tərəfi Rusiya ordusunun itkilərinin daha çox olduğunu düşünür.  

Rusiya vilayətlərinin hakimiyyət orqanları müharibədə həlak olanlar barədə  ad, soyad və rütbələrini qeyd etməklə mütəmadi məlumat verirlər. İlk dəfə bunu Dağıstanın başçısı Sergey Melikov edib. Fevralın 26-da o, zabit Nurməhəmməd Hacımaqomedovun ailəsinə başsağlığı verib. Ondan sonra digər qubernatorlar da belə etməyə başlayıblar.

Beləliklə regional hakimiyyətlər ən azı 71 nəfərin ölməsi barədə məlumat verib. Onların əksəriyyətinin adı  açıqlanıb.

 

Bu məlumatlardan belə çıxır ki, ən azı 39 regiona  "Yük 200"  çatdırılıb. 

"Yük 200" – Cəsəd sözünün yerinə istifədə edilən evfemizmdir.  Tabutla birlikdə yükün çəkisi təxminən 200 kq olduğu üçün sənədləşmədə adı "yük 200” gedir.

Ümumilikdə, ilhaq edilmiş Krım və Sevastopolu saymasaq, Rusiyada 83 federasiya subyekti var.

Rəsmi məlumata əsasən ən çox itki Buryatiya verib. Buranın başçısı 8 nəfərin öldüyünü açıqlayıb.  Əksər digər bölgələrdən 1 və ya 2 nəfər hərbçi ölüb. 

 

Rusiya Müdafiə Nazirliyi hələ də əsir düşmüş  hərbçilərin sayı barədə heç bir məlumat vermir.  Amma martın 9-da daimi hərbi qulluqçülarla bərabər çağırışçıların da Ukraynada döyüşdüyünü eiraf edən nazirliyin mətbuat katibi İqor Konaşenkonun sözlərindən bəlli olur ki,  rus hərbçiləri arasında əsir düşənlər var. 

"Bir sıra hərbi qulluqçular, o cümlədən də çağırışçılar əsir götürülüb",  -  o deyib.  

Fevralın 27-də Ukrayna Daxili İşlər Nazirliyi rus hərbçilərinin yaxınlarına ölən və əsir düşən Rusiya  hərbçiləri barədə məlumat almaq üçün onlayn platformadan bəhrələnməyi təklif edib. Elə həmin gün bu sayt Rusiya Baş Prokurorluğunun tələbi ilə Roskomnadzor tərəfindən bloklanıb.

Rusiyanın regional hakimiyyəti belə resursların "Ukrayna və Qərb kəşfiyyat xidmətlərinin sifarişi ilə” Rusiya hərbçiləri haqqında məlumat toplamaq üçün yaradıldığını bəyan edib.

ABŞ kəşfiyyatı isə Ukraynada keçirilən hərbi əməliyyatın ilk iki həftəsində Rusiya ordusunun 5-6 min hərbçisinin öldüyünü bildirir. Bunu CBS-ə Vaşinqtondakı adının anonim saxlanmasını istəyən mənbə bildirib.

Mənbə əlavə edib ki, yaralıların sayı  ölənlərin sayından  təxminən üç dəfə çoxdur və 15-18 min nəfər təşkil edir.

Rəsmi Kiyev Rus ordusunun şəxsi heyətindən 12 min nəfərin öldüyünü və yaralandığnı bəyan edib.