Ukrayna işğalda olan ərazilərini qaytarmağa başlayıb - Pentaqon

Pentaqon ukraynalılarda Rusiyanın işğal etdiyi əraziləri qaytarmaq qabiliyyəti və hazırlığının əlamətlərini görməyə başlayır. Bununla əlaqədar ABŞ Xarkov yaxınlığında yerləşən İzyum rayonunda gedən döyüşlərə və Xersonu azad etmək cəhdlərinə diqqət yetirir. Rusiyanın müharibəyə başlamazdan qabaq cəmləşdirdiyi qüvvənin 90%-dən az hissəsi qalıb. Rusiya ordusu həmçinin arxa cəbhədən təminatla bağlı çətinliklər yaşayır. 

ABŞ Müdafiə Nazirliyi  Rusiyanın artıq öz gəmilərini  yanacaqla təmin edə bilmədiyini müşahidə edir. Rusiya əsgərləri arasında lazımi geyim təminatı olmaması səbəbindən şaxtadan donma hallarına rast gəlinir. 

Pentaqon hesab edir ki, Rusiya ordusunu möhkəmləndirmək üçün çox güman ki, əvvəlcə başqa ölkələrdə olan batalyon taktik qruplarını  Ukrayna cəbhəsinə gətirəcək. Daha sonra isə Rusiyanın başqa bölgələrində olan hərbçilərini səfərbər edəcəkdir. 

Son bir həftədə Pentaqon Rusiya ordusunun qəsdən və şüurlu şəkildə mülki infrastrukturu hədəfə aldığını görüb. 

Eyni zamanda hərbi cinayət hesab edilən bir çox başqa əməliyyatlara da yol verilib. 

ABŞ hərbçiləri araşdırmalarda iştirak edir ( ABŞ mətbuatında Rusiyanın Ukraynada yol verdiyi hərbi cinayətlərlə bağlı  Dövlət Departamenti  araşdırma aparır).

Azov dənizində  yeddi Rusiya hərbi gəmisi var. Çox  güman ki, Mariupolu onlar bombalayır. 

Qara dənizdə 21 Rusiya hərbi gəmisi var.