Şahin Bağırov yeni qanunun tətbiq mexanizmlərindən danışıb

Şahin Bağırov: Gömrük Məcəlləsinə dəyişikliklər biznesə dəstəyi və şəffaflığı artıracaq

Gömrük Məcəlləsinə təklif olunan dəyişikliklər biznesə dəstəyin gücləndirilməsinə, sahibkarlıq fəaliyyətinin genişləndirilməsinə və gömrük orqanlarının işinin daha şəffaf qurulmasına xidmət edir. Bunu Dövlət Gömrük Komitəsinin sədri Şahin Bağırov parlamentdə Gömrük Məcəlləsinə dəyişikliklər layihəsinin müzakirəsi zamanı bildirib.

Onun sözlərinə görə, Gömrük Məcəlləsi bir neçə il əvvəl qəbul edilib və beynəlxalq ticarətdə baş verən yeni proseslər qanunvericiliyin təkmilləşdirilməsini zəruri edir.

Bağırov bildirib ki, layihədə gömrük auditinin daha dəqiq tənzimlənməsi, kameral və səyyar yoxlamaların ayrılması nəzərdə tutulur.

“Kameral yoxlamalar əsasən elektron məlumatlar əsasında, məsafədən həyata keçiriləcək. Bu yanaşma səyyar yoxlamaların sayının azalmasına imkan verəcək,” o deyib.

DGK sədri qeyd edib ki, səyyar yoxlamalar yalnız zəruri hallarda aparılacaq və digər dövlət orqanları, o cümlədən vergi xidməti ilə koordinasiya olunacaq.

Bağırovun sözlərinə görə, rəqəmsallaşma gömrük sistemində subyektivliyi minimuma endirir və qərarların şəffaflığını artırır.

O əlavə edib ki, yeni dəyişikliklər risk əsaslı gömrük nəzarətinin genişləndirilməsini də nəzərdə tutur. Bu mexanizm beynəlxalq praktikada geniş tətbiq olunur və Azərbaycanda da son illərdə müsbət nəticələr verib.

“Risk idarəetmə sisteminin tətbiqi gömrük nəzarətinin effektivliyini artırıb və dövlət büdcəsinə daxilolmaların artmasına təsir göstərib",- Bağırov bildirib.

Onun sözlərinə görə, dəyişikliklər gömrük sistemində şəffaflığın artırılmasına, rəqabət mühitinin yaxşılaşdırılmasına və biznes subyektləri üçün daha əlverişli şərait yaradılmasına yönəlib.

Gülnar Nazimqızı