Zelenski Lukaşenkonun oğullarına sanksiya tətbiq edib

Ukrayna Prezidenti Volodimir Zelenski Belarus Prezidenti Aleksandr Lukaşenkonun iki oğlu – Viktor və Dmitri Lukaşenkoya qarşı 10 il müddətinə sanksiya tətbiq edib.

Ukrayna prezidentinin rəsmi saytında yayımlanan fərmana əsasən, onlar beynəlxalq sanksiyalardan yayınmağa cəhd etməkdə, qeydiyyatsız biznes fəaliyyəti göstərməkdə və Rusiyaya ikili təyinatlı mallar tədarük etməkdə ittiham olunurlar.

Sanksiya siyahısına ümumilikdə 16 Belarus vətəndaşı və 11 hüquqi şəxs daxil edilib.

Bildirilir ki, bu məhdudiyyətlər Belarus hakimiyyətinin Ukraynaya qarşı mümkün düşmənçilik addımlarının qarşısını almağa yönəlib.

Bundan əvvəl Estoniya Xarici İşlər Nazirliyi Avropa İttifaqının 20-ci sanksiya paketi çərçivəsində Belarusa qarşı məhdudiyyətlərin genişləndirildiyini açıqlamışdı.