Azərbaycan Avropa qaz bazarında Rusiya ilə rəqabət aparmaq niyyətində deyil - Prezident

"Azərbaycan qazının İtaliyaya ixracını iki dəfə artırmaq olar, lakin bunun üçün TAP-ın imkanlarını artırmaq lazımdır. Mən bu məsələni İtaliyanın baş naziri Mario Draqi və İtaliyanın xarici işlər naziri Luici DiMaio ilə müzakirə etmişəm", - Əliyev deyib.

O, həmçinin qeyd edib ki, əlavə kompressor stansiyalarının quraşdırılması ilə TAP-ın ötürücülük qabiliyyəti 20 milyard kubmetr qaza kimi  çatdırıla bilər.

 

"Texniki detallara varmayacağam, lakin bunun üçün TAP-ın səhmdarları konsensusa gəlməli və müvafiq investisiya qərarı verməlidir. Başa düşmək lazımdır ki, bu məsələ bir aya həll oluna bilməz", - Əliyev bildirib.

Prezident vurğulayıb ki, Azərbaycan Avropa qaz bazarında Rusiya ilə rəqabət aparmaq niyyətində deyil.

"Biz heç vaxt qaz bazarında Rusiya ilə rəqabət aparmağı ağlımıza belə gətirməmişik, çünki ixrac edilən həcmlər müqayisəyə gəlməzdir”, - o əlavə edib.

TAP-ın ümumi uzunluğu 878 kilometrdir. O, "Şahdəniz” yatağından Yunanıstan və Albaniyadan keçməklə ildə 10 milyard kubmetr qazın Qərbi Avropaya nəqli üçün nəzərdə tutulub. Qaz kəmərinin layihəsi onun ötürmə qabiliyyətini ildə 20 milyard kubmetrə çatdırmağa imkan verir.

    

Azərbaycan qazının TAP qaz kəməri ilə İtaliya, Yunanıstan və Bolqarıstana ixracı 2020-ci il dekabrın 31-dən başlayıb.

2022-ci ilin iyununda Yunanıstan-Bolqarıstan interkonnektorunun istismara verilməsindən sonra Bolqarıstana veriləcək  Azərbaycan qazının həcmi də 2021-ci ildə olan 300 milyon kubmetrdən bu il 1 milyard kubmetrə kimi artacaq. 

    

TAP layihəsinin sahibləri SOCAR (20%), BP (20%), Snam  (20%), Fluxys (19%), Enagas  ( 16% və Axpo (5%). Layihənin dəyəri 4,5 milyard avrodur.