ABŞ Konqresində 907-ci düzəlişin tam ləğvinə dair ilk qanun layihəsi təqdim edilib

ABŞ-da Respublikaçılar Partiyasının konqresvumenı Paulina Luna 9 dekabrda “Azadlığı Dəstəkləmə Aktı”na edilən 907-ci düzəlişin tam ləğvini nəzərdə tutan qanun layihəsini Nümayəndələr Palatasına təqdim edib. Sənəd elə həmin gün Palatanın Xarici Əlaqələr Komitəsinə göndərilib.

907-ci düzəlişin dəyişdirilməsi ilə bağlı Konqresdə əvvəllər də təşəbbüslər olub, lakin onlar prezidentə düzəlişin tətbiqini müvəqqəti dayandırmaq imkanı verirdi. Bu dəfə təqdim edilən layihə isə fərqlidir — o, düzəlişin tam və geri dönməz şəkildə ləğvini nəzərdə tutur.

1992-ci il 24 oktyabr tarixli ABŞ-ın “Azadlığı Dəstəkləmə Aktı”nın 907-ci maddəsi ABŞ-ın Azərbaycanı hərbi və maliyyə yardımı ilə dəstəkləməsini qadağan edirdi. Maddə erməni lobbisinin təzyiqi ilə qəbul edilmişdi.

2001-ci ildə Konqres prezidentə bu qadağanı illik əsasda dayandırmaq səlahiyyəti verən qərarı təsdiqləmişdi və ABŞ prezidentləri uzun illər bu imkandan istifadə ediblər. Lakin 2023-cü ildə prezident Co Bayden Azərbaycan tərəfindən Qarabağda keçirilən 23 saatlıq antiterror tədbirlərindən sonra dayandırma qərarını uzatmayıb.

N.Təbrizli