Azərbaycanda kredit şirkətindən müştərisinə qarşı kobudluq - SƏS YAZISI

 

"Yaxın bir qohum mənim adıma "Sezam"  mağazasından kreditlə komputer alıb. Ödəmələri gecikdirdiyi üçün mağaza tərəfindən zənglər mənə daxil olur. Gecikmə olanda həmin şirkətdən operator xanım zəng edir çox tərbiyəsiz şəkildə qışqırır,  müqaviləyə aidiyyatı olmayan qohumlara zəng edir. Qanunsuz  şəxsi məlumatlarımızı əldə edir. Hətta rəhmətlik əmimin ailəsinə zəng vuraraq qışqıraraq rəhmətə gedən əmimin gəlməsini tələb edib. Özünü hüquqşünas kimi təqdim edən şəxs bildirdi ki, borcu ödəməsiniz sizin, dayınızın, qonşunuzun internetini və ev telefonunu kəsdirəcəm", - Zaur Rüstəmli deyib.

 

Şikayətçinin göndərdiyi səs yazısında "Sezam" adlı şirkətin Gülbadam Məmmədova adlı əməkdaşının vətəndaşla yüksək tonla danışdığı aydın bilinir. Məmmədova şikayətçiyə bildirir ki, bütün işlərini atıb şəxsən onun işi ilə məşğul olacaq.

 

Azad İstehlakçılar Birliyinin sədri Eyyub Hüseynovun sözlərinə görə belə olan halda vətəndaş İqtisadiyyat Nazirliyinin 012-599-76-00 qaynar xəttinə məlumat verməli və məsələni araşdırmalarını istəməlidir.

 

"Azərbaycanda "İstehlakçıların hüquqlarının müdafiəsi haqqında" qanunda çox boşluqlar var və buna görə belə hallar baş verir. Xüsusilə kredit şöbələri vətəndaşlarla qeyri adekvat danışır. İstehlakçıların hüquqlarını qoruyan dövlət orqanı isə susur. Əslində "İcra hakimiyyətləri haqqında əsasnamə"nin 405-ci bəndində birbaşa ərazi üzrə icra hakimiyyətinin bu cür məsələləri həll etməsi üçün öhdəliyi var. Nədənsə illərdir həmin orqan bu öhdəliyi yerinə yetirməkdən yayınır", -  Hüseynov bildirib.  

 

"Sezam" şirkətinin hüquqşünası Mədinə Leqayeva isə sorğumuza cavab olaraq bildirdi ki, "vətəndaşın şikayəti ilə bağlı məsələ araşdırılacaq".

www.anews.az