Rusiya iqtisadiyyatı güclü görünsə də praktikada zəifləyib -“Times” qəzeti

Londonun "Times” qəzeti Ukraynanın işğalı ilə əlaqədar tətbiq edilən sanksiyalar fonunda Rusiya iqtisadiyyatının vəziyyəti ilə bağlı ətraflı şərh dərc edib.


Qəzetin yazdığına görə, formal olaraq ölkənin iqtisadi vəziyyəti stabil olaraq qalır, amma praktikada bu, tam mənzərədən uzaqdır.


Bir tərəfdən, Times qəzetinin yazır ki, Moskva Avropaya qaz tədarükünü məhdudlaşdırıb və bununla da Qərbdə inflyasiya böhranına səbəb olub ki, bu da həyat səviyyəsinin aşağı düşməsinə gətirib çıxarıb və Ukraynaya ictimai dəstəyi bir qədər zəiflədə bilib.


 Rusiyanın rəsmi iqtisadi məlumatlarına görə isə  müharibənin əvvəlində kəskin ucuzlaşan rubl indi möhkəmlənib və bu ilin ən uğurlu valyutalarından biri olaraq qalır. Statistikaya görə, 2022-ci ilin birinci yarısında Rusiyanın ÜDM-i ötən ilin eyni dövrü ilə müqayisədə cəmi 0,4% azalıb, 12 ayın sonunda isə onun 3%-dən də az düşməsi ehtimalı var. İnflyasiya 13% olacaq. Fevralın sonuna qədər Rusiya büdcəsi profisitlə işləyirdi.


Bununla belə, "Times” tanınmış rusiyalı müxalifətçi Vladimir Milovun (Rusiyada KİV tərəfindən "xarici agent” kimi tanınıb və bu yaxınlarda da axtarışa verilib) hesabatına istinad edir, burada tamamilə fərqli statistik məlumatlar təsvir olunur.


Brüsseldə yerləşən Wilfried Martens beyin mərkəzi üçün yazılmış sənəddə aşağıdakı məlumatlar təqdim olunur:


Rublun möhkəmlənməsi qismən müharibə dövründə neft və qazın şişirdilmiş qiymətlərlə satışından əldə edilən gəlirlə izah olunur. Amma bu həm də Rusiya Mərkəzi Bankının tətbiq etdiyi məhdudiyyətlərlə bağlıdır ki, bu da sanksiyalarla birlikdə Rusiya idxalını təxminən 70% azaldır.


Üçüncü rübdə sanksiyalara görə qaz ixracı 40%, kömür 9% azalıb.


Sentyabrda avtomobil istehsalı 77,4% azalıb.


Əmək qabiliyyətli əhalinin sayı kəskin şəkildə azalıb 


 Mağaza satışları 10% azalıb - bu, rəsmi statistika rekordundan daha dərin iqtisadi tənəzzülün sübutudur.


Rəsmi rəqəmlərə görə, işsizlik cəmi 4% olsa da, ikinci rübün sonuna Rusiyanın ümumi əmək qabiliyyətli əhalisinin 13 faizi, yəni təxminən 4,3 milyon nəfər ödənişsiz və ya qismən ödənişli məzuniyyətə getməyə məcbur olub, yaxud boş qalıb. .






Milov bütün bunları Vladimir Putinin Rusiya iqtisadiyyatının sanksiyalar qarşısında dayanıqlığına dünyanı inandırmaq üçün yaratdığı "Potemkin” mənzərəsi kimi xarakterizə edir.


"Bəs o, bu fasadı nə qədər saxlaya bilər?" – deyə nəşrin müəllifi soruşur. O isə cavab verir: "Sanksiyalar nə qədər uzun müddət davam etsə, zərər də bir o qədər çox olacaq”.


"Əslində Rusiya iqtisadi müharibəni döyüş meydanında uduzduğu kimi uduzur”, - deyə "Times”in köşə yazarı yekunlaşdırıb.


"Bu gün Rusiyada real gəlirlər Putinin Ukraynaya ilk işğalına başladığı 2014-cü illə müqayisədə 10% azalıb. Rusiya iqtisadiyyatını Qərblə itirilmiş ticarəti kompensasiya etmək üçün yenidən istiqamətləndirmək üçün yaxşı variantları da yoxdur”.



www.anews.az