Azərbaycan, İran və Rusiya enerji sistemlərini birləşdirir

 

 

Rusiya energetika nazirinin müavini Pavel Snikkars bildirib ki, bu günə kimi layihənin texniki-iqtisadi əsaslandırmasının hazırlanması davam etdirilir və bu istiqamətdə bir sıra mərhələlər razılaşdırılıb.

 

Millət vəkili Ceyhun Məmmədovun sözlərinə görə, belə bir layihənin həyata keçirilməsi Azərbaycan üçün gələcəkdə yeni imkanlar yaradacaq.

 

"Əslində bu Azərbaycanın gələcəkdə enerjini digər ölkələrə satmaq imkanını daha da genişləndirəcək. Bu baxımdan da belə bir layihənin həyata keçirilməsi çox önəmlidir. Bu gün reallıq ondan ibarətdir ki, dünyada enerjiyə tələbat getdikcə  artır və bu tələbatın ödənilməsi üçün dövlətlər müxtəlif addımlar atırlar. Bu gün Azərbaycan da xaricə enerji satmaq üçün müxtəlif layihələrin icrasına başlayıb. Hesab edirəm ki, belə bir addımın atılması kifayət qədər önəmlidir. Burada söhbət ondan gedir ki, biz bunun üçün texniki imkanları yaradırıq, yəni istənilən vaxt bu prosesə qoşulub hansısa ölkəyə enerjini sata bilərik, eyni zamanda imkanlardan istifadə edib, ehtiyac yaranarsa, enerji də əldə edə bilərik. Buna görə də belə bir əməkdaşlığın qurulması çox önəmlidir. Burda Qərb ölkələrinə və yaxud Azərbaycana problem yaradacaq bir məsələ yoxdur”, - deputat bildirib.

 

Rusiya, Azərbaycan və İranın enerji sistemlərinin birləşdirilməsi məsələsi 2005-ci ildən müzakirə olunur. 2018-ci ilin aprelində Bakıda üç ölkənin energetika nazirləri müavinlərinin görüşü keçirilib. Görüşün yekunlarına görə enerji sistemlərinin birləşdirilməsi məsələsi üzrə üçtərəfli işçi qrup yaratmaq barədə qərar qəbul edilib.