Azərbaycan coğrafi riskləri infrastruktur layihələri ilə azaldır

Açıq dənizə birbaşa çıxışı olmayan Azərbaycan coğrafi həssaslığını minimuma endirmək məqsədilə regional bağlantısallıq (connectivity) və irimiqyaslı nəqliyyat-logistika layihələrinə sərmayə yatırmağı prioritet seçib. Bu barədə iqtisadiyyat naziri Mikayıl Cabbarov CAMCA Regional Forumunun açılışında çıxış edərkən bildirib.

Nazir qeyd edib ki, Bakı Beynəlxalq Dəniz Ticarət Limanı, Bakı–Tbilisi–Qars dəmir yolu xətti, Bakı Gəmiqayırma Zavodu, eləcə də xaricdəki liman və terminallara, boru kəmərlərinə və fiber-optik xətlərə yatırılan investisiyalar dövlətin şüurlu strateji seçimidir.

"Qlobal iqtisadi artımın Yaxın Şərqdəki böhran fonunda zəiflədiyini, lakin rəqəmsallaşma və süni intellektin yeni tələbat yaratdığını deyən M.Cabbarov UNCTAD məlumatlarına istinadla investorların artıq daha az sayda, lakin iri miqyaslı kapital tutumlu layihələrə yönəlib", - Nazir bildirib.  

Enerji sahəsindəki transformasiyaya toxunan nazir neft və qaz mərhələlərindən sonra eyni alıcılar üçün "yaşıl enerji dəhlizi" layihələrinin icra olunduğunu, bu prosesdə Xəzərin şərq sahilindəki tərəfdaşlarla əməkdaşlığın genişləndiyini diqqətə çatdırıb.

Cabbarov həmçinin Cənubi Qafqazın müstəqillik bərpa olunduqdan sonra ilk dəfə olaraq müharibə və ərazi münaqişələrindən tam azad edildiyini və formalaşan davamlı sülhün geniş iqtisadi əməkdaşlıq perspektivləri açdığını qeyd edib.

Aytac Zeynalova