Musk Trampın “xüsusi dövlət qulluqçusu” tituluna layiq görülüb
04.02.2025 16:25
Milyarder İlon Mask rəsmi olaraq ABŞ Prezidenti Donald Trampın xüsusi dövlət qulluqçusu tituluna layiq görülüb. Bu barədə CNN Ağ Evin nümayəndəsinə istinadən məlumat yayıb.
Ağ Ev ilk dəfə Maskın Vaşinqtonda hansı hüquqi əsaslarla çalışdığını rəsmi olaraq şərh edib. Bu status o deməkdir ki, texnologiya sahibkarı və milyarder Mask nə könüllü, nə də tam ştatlı federal məmur deyil.
ABŞ Ədliyyə Nazirliyinin məlumatına görə, xüsusi dövlət qulluqçusu "ildə 130 gün və ya daha az zaman kəsiyində hökumət üçün işləyən və ya işləməsi gözlənilən” şəxsdir.
Maskın maaş almadığını onun işə qəbulu ilə tanış olan bir mənbə CNN telekanalına bildirib. Həmçinin, Maskın dövlət sirlərinə giriş üçün ali səviyyəli məxfi icazəsinin olduğu da qeyd edilib.
Xüsusi dövlət qulluqçusu kimi Mask federal maraqların toqquşması qanununun təsiri altına düşür. Bu qanun dövlət qulluqçularının maliyyə maraqlarına təsir edə biləcək işlərdə iştirak etməsini qadağan edir.
Qanun həm cinayət, həm də mülki qaydada tətbiq oluna, lakin onun icrasına nəzarəti yalnız Ədliyyə Nazirliyi həyata keçirə bilər.
N.Təbrizli
www.anews.az
Foto 
Video 
