Vaşinqtonun yeni tarifləri Azərbaycana necə təsir edəcək?- RƏY

ABŞ 185 ölkəyə idxal olunan məhsullara gömrük rüsumu tətbiq edib.  Ağ Ev rüsumun tətbiq olunduğu ölkələrin siyahısını açıqlayıb. 

ABŞ Moldovadan idxal olunan  mallara 31% (Moldova  ABŞ-dan alınan mallara 61% rüsum tətbiq edib), Azərbaycan, Ermənistan, Gürcüstan, Qırğızıstan, Tacikistan, Türkmənistan və Özbəkistandan  - 10% ( 10%)  Qazaxıstandan  - 27% rüsum tətbiq eidəcək.

Bundan başqa, Əfqanıstan, Braziliya, İran, Səudiyyə Ərəbistanı, Türkiyə və  Böyük Britaniyadan idxal edilən mallara 10%, İsraildən - 17%, İraqdan - 39%,Suriyadan - 41%, Cənubi Afrikadan - 30% rüsum tətbiq ediləcək.

Milli Məclisin deputatı Vüqar Bayramovun fikrincə,  yeni tariflər daha çox qeyri neft-qaz ixrac məhsullarının qiymətinə təsir edəcək. 

"Ötən il ondan əvvəlki il ilə müqayisədə Azrbaycandan ABŞ-a idxal 1.8,  Birləşmiş Ştatlardan ixrac isə  8.4 dəfə artıb. Yəni, ixracatımızın az olmasına baxmayaraq artım dinamikası çox yüksəkdir. Təbii ki, yeni tariflər daha çox qeyri neft-qaz ixrac məhsullının qiymətinə təsir göstərir. 2024-cü ildə qeyri neft-qaz məhsulları üzrə ABŞ-a ixracatımız 134 milyon 663 min dollar olub. Azərbaycan mənşəli qeyri neft-qaz məhsulları üzrə isə 55 milyon 949 min dollarlıq ixrac qeydə alınıb",  -  Bayramov bildirib.

Deputat vurğulayıb ki,  Azərbaycanın Birləşmiş Ştatlara qeyri neft-qaz ixracatı böyük  olmasa da  mal qrupları üzrə çoxşaxəlidir. 

" Vaşinqtonun tarifləri Azərbaycanın ABŞ-a ixracata ciddi təsir göstərməsə də ümumi artım dinamikasına təsir edə bilər. Sözsüz, bütün hallarda yeni tarif yeni xərc deməkdir. Yəni, Birləşmiş Ştatlara ümumi ixracatımızdakı artım faizinin azalacağı istisna deyil",- deputat əlavə edib.

2024-cü ildə Azərbaycanda ABŞ-dan 1 milyard 617 milyon dollarlıq mal idxal edilib. Bu ölkəyə ixrac isə cəmi  135 milyon 30 min dollar olub.

İqtisadçı ekspert Akif Nəsirli hesab edir ki, Amerikanın idxal mallarına rüsum tətbiq etməsi Azərbaycan üçün o qədər də əhəmiyyətli deyil.

"Rüsum tətbiq edilən ölkələrin siyahısına baxanda görürük ki, Azərbaycan bu siyasətin hədəfi olan ölkələr arasında yer almır. Çünki siyahıda minumum rüsum 10 faizdir. Azərbaycan, Gürcüstan, Ermənistan, Türkiyə də 10 faizlik rüsum kateqoriyasına düşüb. Azərbaycanın Amerikaya mal ixracatı yüksək səviyyədə deyil. Odur ki, bu artım  Azərbaycan iqtisadiyyatına təsir etməyəcək",- eskpertvurğulayıb. 

Aytac Zeynalova