Azərbaycanda əmanətlərin dollarlaşması tarixi minimuma enib - Taleh Kazımov

Azərbaycanda rezident fiziki şəxslərin xarici valyutada olan əmanətlərinin payı tarixi minimuma - 25,8%-ə düşüb. Bunu Azərbaycan Mərkəzi Bankının sədri Taleh Kazımov bildirib.

“Dollarlaşma azalmaqda davam edir və rezident fiziki şəxslərin xarici valyutada olan əmanətlərinin payı tarixi minimuma - 25,8%-ə enib”, - Kazımov deyib.

Onun sözlərinə görə, avqustun sonuna Azərbaycanın strateji valyuta ehtiyatları $90,8 milyard təşkil edib. Bu göstərici ölkənin ÜDM-ni üstələyir və 41 aylıq mal idxalını maliyyələşdirməyə imkan verir.

Strateji ehtiyatlar Azərbaycanın xarici dövlət borcundan 3,5 dəfə çoxdur, xarici dövlət borcunun ÜDM-ə nisbəti isə təxminən 6% təşkil edir.

Kazımov bildirib ki, manatın ABŞ dollarına qarşı məzənnəsi 2017-ci ildən sabit qalır.

Azərbaycan Fitch və Moody’s agentliklərinin investisiya səviyyəli suveren kredit reytinqinə malikdir.

Mərkəzi Bankın iyul proqnozlarına əsasən, 2026-cı ilin yekununda qeyri-neft ÜDM-nin 5,4% artacağı, cari əməliyyatlar hesabında isə $6,1 milyard profisit yaranacağı gözlənilir.

Kazımovun sözlərinə görə, inflyasiya Mərkəzi Bankın hədəf dəhlizindədir və orta müddətli dövrdə həmin diapazonda qalacağı proqnozlaşdırılır.

Gülnar Nazimqızı