Azərbaycan manatın 1,7 məzənnəsinin sabitliyini qoruyacaq – Əliyev

Azərbaycan manatının ABŞ dollarına qarşı 1,7 səviyyəsində olan məzənnəsinin sabitliyi davam edəcək. Bunu Azərbaycan Prezidenti İlham Əliyev onun himayəsi altında Bakıda keçirilən II Azərbaycan Beynəlxalq İnvestisiya Forumu çərçivəsində təşkil olunan "Parçalanmış dünyada etimadın bərpası: Cənubi Qafqaz qlobal bağlantı və investisiya sabitliyinin dayağı kimi" mövzusuna dair tədbirdə bildirib.

“2017-ci ilin aprelində bir dollar 1,7 manat idi, bu gün də elədir. Bu sabitlik davam edəcək, çünki yaxşı ticarət balansımız var”, - Əliyev deyib.

Onun sözlərinə görə, məzənnənin sabitliyini ölkənin maliyyə ehtiyatları və aşağı xarici borc səviyyəsi də dəstəkləyir.

Azərbaycanın xarici dövlət borcu ÜDM-in 5,6%-ni təşkil edir, valyuta ehtiyatları isə bu borcu təxminən 10 dəfə üstələyir.
“Biz xarici borcu faktiki olaraq bir gündə sıfırlaya bilərik”, - Prezident bildirib.

Əliyev həmçinin bildirib ki, Azərbaycan 30 il əvvəl xarici investorlarla neft-qaz sektorunda imzalanmış müqavilələrin şərtlərini, bəzi parametrlərindən tam razı qalmasa belə, dəyişdirməyib.
“Müqavilələrin bəzi parametrlərindən 100% razı olmasaq da, məsuliyyətin üstün gəlməli olduğunu düşünürük”, - o deyib.

Prezident siyasi və iqtisadi sabitliyin, təhlükəsizliyin və müqavilə öhdəliklərinə əməl olunmasının Azərbaycana yeni investisiyaların cəlbini dəstəkləyəcəyini bildirib.

Gülnar Nazimqızı