Ukrayna ilə bağlı sülh danışıqları dayanarsa, liderliyi Avropaya verə bilərik - Tramp

Rusiya ilə Ukrayna arasında müharibənin dayandırılması ilə bağlı danışıqlarda irəliləyiş olmasa, ABŞ bu prosesdəki liderliyi Avropaya verəcək.Bu barədə ABŞ prezidenti Donald Tramp bildirib.

Trampın sözlərinə görə, bu münaqişə "yalnız Avropanın problemi olmalı idi" və Vaşinqton "bu işə qarışmamalı idi".

O əlavə edib ki, Ukraynaya silah tədarükünü artırmaq variantını nəzərdən keçirir, lakin münaqişənin sülh yolu ilə həllinə inanır.

Rusiya prezidenti Vladimir Putinlə telefon danışığından sonra Tramp bildirib ki, Moskva və Kiyev "təcili atəşkəs və daha önəmlisi, müharibənin tam başa çatdırılması üçün danışıqlara başlayacaq".

Tramp danışıqların ruhunu "mükəmməl" adlandırıb və hər iki tərəfin müharibədən sonra ABŞ-la ticarətə maraqlı olduğunu qeyd edib.

Putin də gələcək sülh sazişinin əsasını təşkil edə biləcək memorandum üzərində Ukrayna ilə işləməyə hazır olduğunu təsdiqləyib. Rusiya tərəfi Ukraynanın neytral statusu və "münaqişənin əsas səbəblərinin" aradan qaldırılması tələbini irəli sürür.

Ağ Evin sözçüsü Karolayn Levitt Trampın "hər iki tərəfin mövqeyindən məyus olduğunu" bildirib və Rusiyaya qarşı ikinci dərəcəli sanksiyaların tətbiqini nəzərdən keçirdiklərini deyib.

ABŞ-ın vitse-prezidenti Cey Di Vens isə Putinin sülh niyyətlərinin səmimiliyinə şübhə etdiyini və Moskvanın konkret təkliflər təqdim etməsinin vacib olduğunu bildirib.

Ukrayna Prezidenti Volodimir Zelenski bildirib ki, Rusiyanın ərazi tələbləri müharibəni uzatmaq üçün bəhanədir və Ukrayna ərazi bütövlüyündən imtina etməyəcək.

ABŞ prezidenti Donald Tramp və Avropa liderləri ilə telefon danışıqlarından sonra Kiyevdə jurnalistlərin qarşısına çlxan Zelenski qeyd edib ki, Tramp Ukrayna ilə Rusiya arasında birbaşa danışıqların başlanmasını mümkün hesab edir və atəşkəsin ilk addım kimi vacib olduğunu düşünür.

“Mən atəşkəsi ilk addım kimi görmək istərdim ki, Rusiya bu müharibəyə son qoymağa həqiqətən hazır olduğunu göstərə bilsin,” —  Zelenski bildirib.

“Beş vilayətdən imtina və ordumuzun ərazilərimizdən çıxarılması — bu heç vaxt baş verməyəcək”. -  o vurğulayıb.

Prezident Ukraynanın ərazi bütövlüyünü “qırmızı xətt” adlandırıb.

N.Təbrizli