Regional enerji təhlükəsizliyi üçün yeni interkonnektor layihələri vacibdir -Rumıniya energy naziri

Regionun enerji təhlükəsizliyinin və bərpa olunan enerji mənbələrinin inteqrasiyasının gücləndirilməsi üçün sərhədlərarası elektrik və qaz interkonnektorlarının inkişafı vacibdir. Bunu Rumıniyanın energetika naziri Pavel Kasian Nitulesku çərşənbə axşamı bildirib.

Bakıdakı Enerji Forumunda çıxış edən Nitulesku vurğulayıb ki, Rumıniya infrastruktur layihələrinə sərmayələri prioritet hesab edir və bu istiqamətdə regionun təhlükəsizliyin və dayanıqlığın artırılmasına çalışır. O, Rumıniyanın Yunanıstan, Bolqarıstan, Macarıstan, Moldova və Ukrayna ilə birgə həyata keçirdiyi Şaquli Dəhliz layihəsində iştirak etdiyini və bunun Mərkəzi və Şərqi Avropada təchizat imkanlarını genişləndirməyə xidmət etdiyini qeyd edib.

Nazir, həmçinin, Qara dənizdən Rumıniyanın qərb sərhədinədək uzanacaq 5,000 MVt gücündə yüksək gərginlikli birbaşa cərəyan (HVDC) interkonnektorunun tikintisini diqqətə çatdırıb. 

“Layihə Azərbaycan, Gürcüstan və Macarıstanla əməkdaşlıq çərçivəsində Qara dəniz üzərindən sualtı kabel vasitəsilə genişləndiriləcək və Avropa İttifaqının “Yaşıl Dəhliz” təşəbbüsünün bir hissəsi olacaq”, - o bildirib.

Nitulesku deyib ki, Rumıniyanın Qara dənizdə 2027-ci ilə qədər planlaşdırılan dəniz qaz hasilatı, gələcək külək enerjisi layihələri və kiçik modullu reaktorları da əhatə edən nüvə layihələri ölkənin Avropa enerji bazarında rolunu daha da gücləndirəcək.

Nazir əlavə edib ki, gələcəkdə səylər enerji sektoruna investisiya cəlbi, strateji tənzimləmə bazasının yaradılması və Rumıniyanın spesifik ehtiyaclarına uyğun istehsal güclərinin inkişafına yönələcək. 

O, təhlükəsiz, əlçatan və təmiz enerji təchizatının əhəmiyyətini vurğulayıb.

Nitulesku, həmçinin, Rumıniyanın Moldova və Ukrayna kimi qonşularına enerji təchizatı və nəqliyyat şəbəkələrinin dayanıqlığının artırılması istiqamətində verdiyi dəstəyi xatırladıb.

“Rumıniya regionun enerji təhlükəsizliyinin təminatında etibarlı tərəfdaş olaraq qalır və enerji sahəsində davamlı, səmərəli və sadiq əməkdaşlığa açıqdır,” — Nitulesku bildirib .

N.Təbrizli