ACWA Power Azərbaycanın külək enerjisi layihəsində iştirak payını 95 faizə çatdırıb

Səudiyyə Ərəbistanının enerji şirkəti ACWA Power Azərbaycanda inşa etdiyi 240 meqavatlıq külək elektrik stansiyası layihəsində yerli iştirak payını 95 faizə çatdırıb, şirkətin Azərbaycan və Türkiyə üzrə baş ölkə meneceri Selim Güven çərşənbə günü bildirib.

Güven deyib ki, şirkət layihələrində uzunmüddətli risk bölgüsü, yerli kadrların hazırlanması və bazara inteqrasiya prinsiplərinə üstünlük verir. 

“Azərbaycan layihəsində biz yalnız çatışmayan sahələrdə xarici ekspertlər cəlb edirik. Əsas məqsədimiz yerli bazarın imkanlarını inkişaf etdirməkdir,” — o bildirib.

ACWA Power hazırda Azərbaycanda 240 meqavatlıq külək elektrik stansiyasının tikintisini davam etdirir. Layihənin ilk 80 meqavatlıq hissəsinin bu ilin avqustunda istismara verilməsi planlaşdırılır, bütün stansiyanın isə ilin sonuna qədər tam gücü ilə fəaliyyətə başlaması nəzərdə tutulur.

Şirkət eyni zamanda Türkiyənin Kızıl bölgəsində iki mərhələdə həyata keçirilən ümumi 240 meqavatlıq külək layihəsi üzərində işləyir. 

İlk 80 meqavatlıq blokun avqustda, növbəti mərhələlərin isə sentyabr və oktyabrda istismara verilməsi gözlənilir.

Güven qeyd edib ki, ACWA Power Qlobal Cənub ölkələrində yaşıl enerji keçidini dəstəkləyir və burada infrastrukturun inkişafı və iqtisadiyyatın şaxələndirilməsi üçün böyük potensial görür.

 “Biz COP29 zamanı əldə olunan maliyyə nailiyyətləri sayəsində bu layihələr üçün tələb olunan kapitalı cəlb edə bildik,” — o vurğulayıb.

ACWA Power hazırda 12 ölkədə fəaliyyət göstərir və əsasən bərpa olunan enerji, su avadanlıqları və desalinasiya layihələrinə fokuslanır.

N.Təbrizli