Tramp İranla ticarət edən ölkələri 25% tariflərlə hədələyib

ABŞ Prezidenti Donald Tramp İranla ticarət edən ölkələrə qarşı 25 faiz tarif tətbiq ediləcəyini açıqlayıb.

Tramp Truth Social platformasında paylaşımında bildirib ki, İranla iş görən istənilən ölkə ABŞ ilə apardığı bütün ticarət əməliyyatları üzrə 25% tarif ödəməli olacaq. Onun sözlərinə görə, bu qərar “dərhal qüvvəyə minir” və “qəti, geri dönməzdir”.

Tariflərin ABŞ idxalçıları tərəfindən ödənildiyi qeyd olunur. OPEC üzvü olan İran uzun illərdir Vaşinqtonun sərt sanksiyaları altındadır. İran neftinin əsas alıcısı Çin hesab olunur, digər əsas ticarət tərəfdaşları isə Türkiyə, İraq, Birləşmiş Ərəb Əmirlikləri və Hindistandır.

Tramp qərarın icrası ilə bağlı əlavə detallar açıqlamayıb. Ağ Evin rəsmi saytında bu siyasətə dair hər hansı sənəd, hüquqi əsas və ya tətbiq mexanizmi dərc olunmayıb. Ağ Ev şərh sorğularına cavab verməyib.

Gülnar 

Bu arada, Vaşinqtondakı Çin səfirliyi Trampın yanaşmasını tənqid edərək, Pekinin öz maraqlarını qorumaq üçün “bütün zəruri tədbirləri” görəcəyini bəyan edib. Çin səfirliyinin X platformasında yaydığı açıqlamada bildirilib ki, Çin “qanunsuz birtərəfli sanksiyalara və genişləndirilmiş yurisdiksiyaya” qarşıdır və tarif müharibələrində qalib olmur.