Leyla Əliyeva: qadınların güclənməsi cəmiyyətin inkişafının əsas şərtidir

Qadınların cəmiyyətdə rolunun artması dayanıqlı inkişaf üçün əsas amillərdən biridir. Bunu Heydər Əliyev Fondunun vitse-prezidenti Leyla Əliyeva “AQEM məkanında davamlı inkişaf naminə qadınların səslərinin gücləndirilməsi” mövzusunda beynəlxalq konfransında çıxışı zamanı deyib.

O, qadınların gözəl və unikal olduqlarını, eyni zamanda müsbət və parlaq enerji daşıdıqlarını vurğulayaraq qeyd edib ki, qadınlar tərəqqi ilə məsuliyyət arasında incə tarazlığı daha dərindən hiss edirlər.

Leyla Əliyeva bildirib ki, qadın yalnız cəmiyyətin fəal üzvü deyil, həm də anadır və məhz güclü, özünə inanan, sevgi və dəyər görən qadın sağlam, mərhəmətli və inamlı nəsil yetişdirir.

Onun sözlərinə görə, bu, hər bir ölkənin uğurunun əsasını təşkil edir.

“Ən çətin qərarlar belə sevgi, mərhəmət və inam olmadan qəbul edilə bilməz. Qadınlar bu dəyərləri dərindən hiss edir”, - o əlavə edib.

Gülnar Nazimqızı