Londonda yəhudi icmasına hücum olub, üç nəfər yaralanıb

Londonun şimalında yəhudi icmasının nümayəndələrinə qarşı hücum nəticəsində üç nəfər yüngül xəsarət alıb.Bu barədə London polisi (“Scotland Yard”) məlumat yayıb.

Məlumata görə, insident mayın 9-na keçən gecə Enfild rayonunun Sautberi-Roud küçəsində baş verib.

Polis bildirib ki, şübhəli şəxs saxlanılıb və ona qarşı ittiham irəli sürülüb. Hadisə zamanı 58 və 26 yaşlı iki kişi, həmçinin 53 yaşlı qadın yüngül xəsarət alıb. Yaralıların əlavə tibbi yardıma ehtiyac olmadığı qeyd olunub.

“Scotland Yard” saxlanılan şəxsin Londonun Hornçerç bölgəsində yaşayan 34 yaşlı Dilan Ossey olduğunu açıqlayıb. Ona qarşı irqi və dini nifrət zəminində hücum, təhdid xarakterli və təhqiramiz davranış, zorakılığa təhrik və təqib də daxil olmaqla beş maddə üzrə ittiham irəli sürülüb.